თეთრი სახლის პრესმდივანი ჯენიფერ ფსაკი ხუმრობს იმ სანქციებთან დაკავშირებით, რაც რუსეთმა ჯო ბაიდენსა და აშშ-ის სხვა მაღალჩინოსნებს დაუწესა.
მისი თქმით, გამოდის, რომ რუსეთმა სანქცირებულთა სიაში არა ჯო ბაიდენი, არამედ აწ განსვენებული მამამისი შეიყვანა.
როგორ მოხდა ეს?
საქმე ის გახლავთ, რომ ჯო ბაიდენი მამამისის თითქმის სრული სეხნიაა, თუ არ ჩავთვლით იმას, რომ მოქმედი პრეზიდენტის გვარის ბოლოს, წესით, იწერება უმცროსი (Jr).
ანუ, აშშ-ის ახლანდელი პრეზიდენტის მამა იყო ჯოზეფ რობინეტ ბაიდენი, ხოლო მისი შვილი ჯოზეფ რობინეტ ბაიდენ-უმცროსია. რუსულ სიაში კი სანქცირებულია ჯოზეფ რობინეტ ბაიდენი და არა ბაიდენ-უმცროსი.
“შესაძლოა, სინამდვილეში რუსეთმა სანქციები ჯო ბაიდენის აწ განსვენებულ მამას დაუწესა”, – იხუმრა ბრიფინგზე ფსაკიმ.