მოსკოვის ცენტრში მდებარე რესტორან Balzi Rossi-ში მომხდარი აფეთქების შესახებ ახალი დეტალები ხდება ცნობილი.

რუსეთის ეროვნული ანტიტერორისტული კომიტეტის განცხადებით, აფეთქება თვითნაკეთმა ასაფეთქებელმა მოწყობილობამ გამოიწვია, რომლის რესტორანში შეტანასაც უცნობი ქალი ცდილობდა.

კომიტეტის ინფორმაციით, ქალი რესტორანში შესვლისას დაცვის თანამშრომელმა შეაჩერა, რის შემდეგაც, შესასვლელთან, ვერანდაზე, ასაფეთქებელი მოწყობილობა ამოქმედდა.

ოფიციალური მონაცემებით, დაიღუპა სამი ადამიანი:
▪️ დაცვის თანამშრომელი, რომელმაც ქალის შეჩერება სცადა;
▪️ თავად ქალი, რომელსაც, გამოძიების ვერსიით, ასაფეთქებელი მოწყობილობა ეჭირა;
▪️ რესტორნის ერთ-ერთი სტუმარი.

დაშავებულია 21 ადამიანი.

აფეთქება 1 აგვისტოს, მოსკოვის დროით 19:55 საათზე, კუდრინის მოედანზე მდებარე, ე.წ. სტალინურ ცათამბჯენში განთავსებულ რესტორან Balzi Rossi-ში მოხდა.

რუსული მედიის ცნობით, რესტორანი იმ საღამოს კერძო ღონისძიების გამო იყო დაკეტილი, თუმცა ღონისძიების ხასიათზე ურთიერთგამომრიცხავი ცნობები ვრცელდება.

ზოგიერთი რუსული წყარო წერს, რომ რესტორანში ქორწილი იმართებოდა, რომელსაც დაახლოებით 50 სტუმარი ესწრებოდა. უკრაინული მედია კი ირწმუნება, რომ იქ ერთ-ერთი რუსი გენერლის დაბადების დღე აღინიშნებოდა.

ამ ეტაპზე არც რუსეთის ხელისუფლებას და არც სანდო რუსულ მედიას არ დაუდასტურებია, რომ ღონისძიება მართლაც რომელიმე გენერლის დაბადების დღეს უკავშირდებოდა. ასევე, არ სახელდება დაღუპული ან დაშავებული სტუმრების ვინაობა.

არსებული ინფორმაციით, აფეთქება იმ დროს მოხდა, როდესაც სტუმრების ნაწილი ჯერ კიდევ არ იყო შეკრებილი და ღონისძიება ოფიციალურად დაწყებული არ იყო.