“უკრაინა დღეს დე-ფაქტო ნატოს მეორე არმიაა” – განაცხადა უკრაინის პრეზიდენტმა, ვოლოდიმირ ზელენსკიმ “რამშტაინის” ფორმატისა და ევროპული საბჭოს შეხვედრების შეჯამებისას. მისი თქმით, უკრაინამ უკვე დაამტკიცა თავისი ძალა ბრძოლის ველზე და ფაქტობრივად გახდა ალიანსის ერთ-ერთი საკვანძო სამხედრო ძალა.”სწორედ ამიტომ, NATO-ს სჭირდება უკრაინა არა მხოლოდ დე-ფაქტო, არამედ დე-იურეც – ამბობს ზელენსკი.უკრაინის პრეზიდენტმა ასევე აღნიშნა, რომ „რამშტაინის“ შედეგების მიხედვით, ცხრა ქვეყანამ დაუჭირა მხარი Patriot-ის სისტემებისთვის რაკეტების შესყიდვის პროგრამას, რომლის ღირებულებაც 1 მილიარდ დოლარზე მეტია. გარდა ამისა, არსებობს შეთანხმებები დამატებით F-16 გამანადგურებლებზე, ხოლო პარტნიორებს ცალკე სთხოვენ თანხების გამოყოფას უკრაინელი სამხედროების კონტრაქტების დასაფინანსებლად. ზელენსკიმ პარტნიორები იმაშიც გააფრთხილა, რომ პუტინი სუსტდება პოლიტიკურად, ფრონტზე და ფიზიკურადაც, რის გამოც მან შესაძლოა გააძლიეროს უკრაინის ქალაქებზე რაკეტებითა და დრონებით დარტყმები.”ჩვენ გვინდა ეს ომი ზამთრამდე დავასრულოთ, დიპლომატიისა და რუსეთზე ზეწოლის გაძლიერების ხარჯზე” – თქვა ზელენსკიმ და
ევროკავშირის ქვეყნებს მოუწოდა, ნუ გააჭიანურებენ ევროპის მშვიდობის ფონდიდან განბლოკილი €6 მილიარდის გამოყენებას. ეს თანხა საჭიროა საჰაერო თავდაცვისთვის, შორ მანძილზე მოქმედი იარაღისა და ენერგეტიკის დასაცავად. მან ასევე გააფრთხილა პარტნიორები, რომ თუ ომი კიდევ ერთ ზამთარს გაგრძელდება, უკრაინას დასჭირდება დახმარების ცალკეული პაკეტი – გაზი, დიზელი, ენერგოაღჭურვილობა და სულ მცირე 300 რაკეტა საჰაერო თავდაცვისთვის ზამთრის პერიოდში.