ევროპარლამენტმა საქართველოს შესახებ ანგარიში დაამტკიცა – დოკუმენტი ევროკავშირის წევრ ქვეყნებს მოუწოდებს, რომ მიზნობრივი სანქციები დაუწესდეთ ბიძინა ივანიშვილს, ქართული ოცნების ლიდერებს, მოსამართლეებს, პროკურორებსა და იმ პირებს, ვინც “საქართველოში დემოკრატიულ უკუსვლაზე და არჩევნების გაყალბებაზე არიან პასუხისმგებელი”. დოკუმენტის მიხედვით, ევროპარლამენტი მიესალმება ეუთოს მიერ, 24 წევრი ქვეყნის ინიციატივით, „მოსკოვის მექანიზმის“ ამოქმედებას, რაც საქართველოში, ეუთოს წინაშე აღებული ვალდებულებების შესაფასებლად, ექსპერტთა მისიის გაგზავნის საშუალებას იძლევა.დოკუმენტში ირაკლი ღარიბაშვილზე და მის დაპატიმრებაზეც არის საუბარი. ანგარიშის მიხედვით, არსებობს სერიოზული შეშფოთება – აკმაყოფილებს თ არა სამართალწარმოება სამართლიანი სასამართლოს სტანდარტებს: “ევროპარლამენტი აღნიშნავს, რომ ბრალის აღიარებისა და კორუფციის შესახებ სანდო საჯარო მტკიცებულებების არსებობის მიუხედავად, ყოფილი პრემიერ-მინისტრის ირაკლი ღარიბაშვილის დაპატიმრება სერიოზულ შეშფოთებას იწვევს იმასთან დაკავშირებით, აკმაყოფილებდა თუ არა სამართალწარმოება სამართლიანი სასამართლოს სტანდარტებს; ხაზგასმით აღნიშნავს, რომ საქმე ასახავს უფრო ფართო შეშფოთებას პოლიტიკური გავლენის ქვეშ მყოფ მართლმსაჯულებასთან, ძალაუფლების არაფორმალურ სტრუქტურებთან და მმართველი პარტია „ქართული ოცნების“ შიდა დაყოფებთან, მათ შორის ბიძინა ივანიშვილის როლთან დაკავშირებით“ – აღნიშნულია დოკუმენტში.გარდა ამისა, დოკუმენტი გმობს “ოცნებასთან” დაკავშირებული მედიასაშუალებების როლს ევროკავშირისა და მისი წარმომადგენლების წინააღმდეგ მიმდინარე დეზინფორმაციაში. ანგარიშის თანახმად, ევროპარლამენტი “მოუწოდებს ევროკავშირს სანქციების სიაში შეიყვანოს საქართველოს ეროვნული კომუნიკაციების კომისიისა და საზოგადოებრივი მაუწყებლის ხელმძღვანელობის წევრები“.