ვისურვებდი, რომ სერიოზულად მიუდგნენ ადამიანის უფლებების მდგომარეობას ევროკავშირში ბრიუსელის ჩინოვნიკები, ვინაიდან ჩვენ ვხედავთ, და არა მარტო ჩვენ, აშშ-სგანაც მიიღეს მწვავე კრიტიკა.

ვხედავთ, რომ დღითიდღე უარესდება ადამიანების უფლებების მდგომარეობა EU-ში, რაც ეხება გამოხატვის თავისუფლებას და კოპენჰაგენი არ არის ცალკეული გამონაკლისი, იგივე სურათი ვიხილეთ ბერლინში, პარიზში, სხვა დედაქალაქებში მშვიდობიანი მიტინგების დარბევის დროს. კოპენჰაგენში განსაკუთრებული ბრუტალურობა იყო, რაც ვიხილეთ, როდესაც ხელკეტებით და ძაღლებით დაარბიეს მშვიდობიანი დემონსტრანტები, მაშინ, როდესაც არანაირ საფრთხეს იქ არ წარმოადგენდნენ. როგორც ჩანს, დანიის პოლიცია არ აპირებს, რომ გამოიძიოს ეს დარბევა და მნიშვნელოვანია, რომ გამოძიებული იყოს და დამნაშავეები დაისაჯონ. დანიის შემთხვევაშიც არ არის ეს გამონაკლისი, დანიას ძალიან მძიმე ისტორია აქვს ადამიანის უფლებების დარღვევისა. 10-წლეულების განმავლობაში, 90-იანების ჩათვლით, იცით, რომ გრენლანდიის ქალი მოსახლეობის ნახევარის იძულებით და მოტყუებით სტერილიზაცია განახორციელა დანიის ხელისუფლებამ, მაშინ, როცა უკვე EU-ს წევრი იყო. […] მთელი ეს სისტემა, რომელიც შეფასებულია გენოციდად ზოგიერთი გრენლანდიელი პოლიტიკოსის მხრიდანაც, არ არის გამოძიებული, არავინ არ არის დასჯილი ამ დანაშაულისთვის. სამწუხაროა, როცა ასეთი ქვეყნიდან წარმომადგენლები სხვებს ესაუბრებიან სტანდარტებზე.

ჩვენ უნდა გავითავისუფლოთ თავი იმ კომპლექსებისგან, რომლების მოხვევასაც წლები ცდილობდნენ – თითქოს ვართ მეორეხარისხოვანი ერი, ბოლომდე არგანვითარებული ერი, თითქოს დანიამ, გერმანიამ თუ სხვა ქვეყანამ უნდა გვასწავლოს როგორია სწორი ცხოვრება, სწორი ევროპელობა. იქით ვასწავლით ყველას რას ნიშნავს ევროპელობა და რას ნიშნავს ადამიანის უფლებები.
თქვა  შალვა პაპუაშვილმა.