მგზავრების საქალაქთაშორისო გადაყვანები ძვირდება. ამის შესახებ ინფორმაცია ოკრიბას იურისტმა, პაატა ყვავაძემ BMG-ს დაუდასტურა, მისი ცნობით, მგზავრობის გაძვირება საწვავის ფასის ზრდამ განაპირობა, სხვადასხვა მიმართულებით მგზავრობის ტარიფის გაზრდა კი აღდგომის დღესასწაულის შემდეგ დაიწყო.
ცნობისთვის, დიდუბის სადგურ ოკრიბადან ზუგდიდის, ჭიათურისა და ბაკურიანის მიმართულებით მგზავრობა 5 ლარით გაძვირდა.
“ახალი კანონმდებლობისა და რეფორმის თანახმად, ავტოსადგური მგზავრობის ფასს აღარ ადგენს. გადამზიდავი ავტოსადგურს წარუდგენს ცნობას, სადაც დასაბუთებულია ტარიფის ცვლილება მაგალითად, საწვავის ფასის მატება. გადამზიდავი უთითებს, რომ არსებული ხარჯებიდან გამომდინარე, მას ამ კონკრეტულ ფასად უწევს მუშაობა და სთხოვს ავტოსადგურს, აღნიშნული ინფორმაცია ცნობად მიიღოს. ინფორმაციის ცნობად მიღების შემდეგ, ავტოსადგური გამოსცემს ბრძანებას და ავალებს კონკრეტულ სალაროებს, რომ მოცემული გადამზიდავის მიერ მითითებულ მიმართულებაზე ბილეთების რეალიზაცია ახალი ტარიფით მოხდეს”. – უთხრა BMG-ს ყვავაძემ.