“პროკურატურა შეგნებულად ატყუებს სასამართლოს, როცა ამბობს რომ მე ვიმყოფებოდი რეზიდენციის ეზოში” – ამის შესახებ სასახლის ღობის საქმეზე ბრალდებულმა ირაკლი ჩხვირკვიამ განაცხადა და სასამართლოს საბოლოო სიტყვით მიმართა.

მისი თქმით, პრეზიდენტის რეზიდენციის, ან რაიმე სხვა დაწესებულების აღების მცდელობა არ ჰქონია და მსგავსი რამე რომ დაეპირებინა მინიმუმ სახეს დაიფარავდა.

…გამოძიების პირველ ეტაპზე ვითხოვთ, რომ პროკურატურამ მოიტანოს რამე სხვა მტკიცებულება, გარდა იმ ვიდეოსი, სადაც მე არათუ რამეს ვაფუჭებ, უბრალოდ ვარ. არ არსებობს ბუნებაში არცერთი მტკიცებულება, რომ მოეტანა ვთქვათ პრეზიდენტის რეზიდენციის კამერის ამონაწერი, ის მონაკვეთი, სადაც მე ვჩანვარ, ნახავდით იმას, რაც ჩანს იმ 6 წამში.

… პროკურატურა შეგნებულად ატყუებს სასამართლოს, როცა ამბობს რომ მე ვიმყოფებოდი რეზიდენციის ეზოში, არ გადავსულვარ ტერიტორიაზე, არ მქონია მცდელობა რეზიდენციის, ან სხვა რაიმე დაწესებულების აღების. რომ მქონოდა წინასწარი განზრახვა, ან ინფორმაცია რომ მქონოდა, რომ ასეთი რამე შეიძლება მოხდეს, მე განმეხორციელებინა რაიმე სახის მოქმედება, აუცილებლად, როგორც მინიმუმ სახეს დავიფარავდი,” – განაცხადა ირაკლი ჩხვირკვიამ.