“სიტყვამ “რევოლუცია” არ შეგაშინოს მკითხველო!…” – ილია ჭავჭავაძის ამ სიტყვებით დაიწყო უფლებადამცველმა შოთა თუთბერიძემ დასკვნითი სიტყვა სასახლის ღობის საქმეზე, თბილისის საქალაქო სასამართლოში.

მისი განცხადებით, ეს ფრაზაა სიმბოლო, თუ ვინ გამოხატავს ქართველი ხალხის სათქმელს და ვინ წარმოადგენს რუს ოლიგარქს.

ბაზა პროკურატურის მიერ წარმოდგენილი ყველა ბრალდებისა იყო სიტყვა “რევოლუცია” და მე სწორედ ამ სიტყვაზე საუბრით მინდა დავიწყო, სწორედ ამ სიტყვაზე ძალიან ცნობილი ციტატით, ჩემთვის ძალიან პატივსაცემი ადამიანის ტექსტებიდან: “სიტყვამ “რევოლუცია” არ შეგაშინოს მკითხველო! რევოლუცია იმისთვის არის გაჩენილი, რომ მშვიდობიანობა მოაქვს. ღვინო ჯერ უნდა ადუღდეს, აირიოს-დაირიოს და მერე დაიწმინდება ხოლმე, ასეა ყველაფერი ამ ქვეყანაზე”.

ბატონო მოსამართლე, ამ ფრაზით დავიწყე ჩემი სიტყვა, იმიტომ, რომ ამ ტერმინის გამოყენების გამო, შინაარსის ხმამაღლა და თანამედროვე სალიტერატურო ქართული გადმოცემის გამო საქართველოს მოქალაქეებს სისხლის სამართლის პასუხისმგებლობას აკისრებს რეჟიმი, რომელმაც ურალატა ყველაფერს, რისთვისაც წლების წინ მანდატი და ძალაუფლება მიიღო. ეს ფრაზაა სიმბოლო, თუ ვინ არის ამ დარბაზში ხალხის წარმომადგენელი, ვინ გამოხატავს ქართველი ხალხის სათქმელს, ვინ აჟღერებს ქართველი ხალხის სურვილებს და ვინ წარმოადგენს რუს ოლიგარქს, რომელიც ისევ ილიას სიტყვებით რომ ვთქვათ, საქართველოში დისლოცირებული როტის ხელმძღვანელია,” – თქვა შოთა თუთბერიძემ.

ცნობისთვის, მურთაზ ზოდელავას, პაატა ბურჭულაძეს და ირაკლი ნადირაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ასევე ბრალი წარდგენილი აქვთ სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. მათ ბრალი წარდგენილი აქვთ სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9- წლამდე თავისუფლების აღკვეთას ითვალისწინებს.
ირაკლი შაიშმელაშვილს ბრალდება საქართველოს სისხლის სამართლის კოდექსის 317-ე მუხლით წარედგინა, რაც გულისხმობს საქვეყნოდ მოწოდებას საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ, რაც სასჯელის სახედ და ზომად 3- წლამდე თავისუფლების აღკვეთას ითვალისწინებს.
ლაშა ბერიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ბრალდება ასევე წარდგენილი აქვს სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს.
ირაკლი ჩხვირკიას, ნიკა გვენცაძეს, თორნიკე მჭედლიშვილს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ასევე ბრალი წარდგენილი აქვს სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. აღნიშნული ქმედება სასჯელის ზომად 6-დან 9- წლამდე თავისუფლების აღკვეთას ითვალისწინებს.
გური ჟვანიას ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.
პაატა მანჯგალაძეს ბრალდება სსსკ-ის 225-ე მუხლის პირველი ნაწილით წარედგინა, რაც ჯგუფური ძალადობის ორგანიზებას გულისხმობს. აღნიშნული ქმედება სასჯელის სახედ და ზომად 6-დან 9- წლამდე თავისუფლების აღკვეთას ითვალისწინებს.