მთავრობის ადმინისტრაცია დღეიდან პროტესტის კიდევ ერთ ეპიცენტრად იქცევა. დიუშენის სინდრომის მქონე ბავშვების მშობლები აცხადებენ, რომ დღეს, 17:00 საათზე, სამთავრობო ადმინისტრაციასთან შეიკრიბებიან.
მოქალაქეები სახელმწიფოსგან მათი შვილებისთვის აუცილებელი მედიკამენტის უზრუნველყოფას ითხოვენ. მათი განცხადებით, სამთავრობო კვარტალში 24-საათიანი პროტესტი გაგრძელდება იქამდე, ვიდრე ხელისუფლება ძვირადღირებული პრეპარატის ქვეყანაში შემოტანას არ უზრუნველყოფს.
პაციენტების ოჯახები ადგილზე კარვების გაშლას გეგმავენ, თუმცა, მათი ინფორმაციით, შინაგან საქმეთა სამინისტრო შესაბამის ნებართვას ამ ეტაპზე არ გასცემს.
მშობლები ასევე მიმართავენ სახალხო დამცველს და მოუწოდებენ, მიმდინარე პროცესში მათ გვერდით დადგეს.
უმოქმედობამ, რომ არ ჰქონდათ კომუნიკაცია პროვაიდერ კომპანიებთან, უმოქმედობამ, რომ არ გაიარეს და არ შექმნეს გუნდი და ყველა მიმართულებით უმოქმედობამ. ჩვენ უკვე გადავინაცვლეთ პრემიერ-მინისტრის ადმინისტრაციასთან, გადავწყვიტეთ, რომ უწყვეტი აქციები გავმართოთ მანამ, სანამ არ იქნება შედეგი მიღწეული. პირველ ხაზზე არიან თითონ მებრძოლი დიუშენელები, ჩვენი შვილები, რომლებიც თითონ ითხოვენ მედიკამენტებს. ჩვენ მათი მხარდამჭერები ვართ, ჩვენ მათი წარმომადგენლები ვართ და ის, რომ ჩვენ რაღაცას ვითხოვთ და ვიღაცა პოლიტიკური დივიდენდების მიღებას ცდილობს, ეს აბსურდია და იმაზე მეტი დანაშაულია, რაც არის უმოქმედობა და ეს გამორიცხულია, იმიტომ, რომ თუ ვინმე ჩვენ მხარს გვიჭერს, აქ ბავშვის სიცოცხლეს და ჯანმრთელობას ეხება და არცერთი ადამიანი არ იქნება ისეთი მხარდამჭერი ჩვენს ირგვლივ, ვინც რაიმე სახით პოლიტიკურ დივიდენდებს მიიღებს, – ამბობს ზაქარია გვიშიანი.
დიუშენის კუნთოვანი დისტროფია გენეტიკური დაავადებაა, რომელიც კუნთების განვლევას და დასუსტებას იწვევს.