ოფიციალური მონაცემების მიხედვით, „ქართულმა ოცნებამ“ მიმდინარე წელს 980 ათასი ლარის შემოწირულება მიიღო. მმართველ პარტიას 15 იანვრიდან 27 თებერვლის ჩათვლით პერიოდში 28 შემომწირველი ჰყავდა. მათ შორის: თბილისის მერი, კახა კალაძე. მან პარტიას 12 ათასი ლარი შესწირა.

რაც შეეხება „ლელო-ძლიერი საქართველოს“ შემოწირულებას, ოფიციალური მონაცემების მიხედვით, პარტიას მიმდინარე წლის 2 თვეში, 8 იანვრიდან 19 თებერვლის ჩათვლით პერიოდში 146 ათასი ლარის შემოწირულება აქვს მიღებული. შემომწირველებს შორის არიან „ლელოს-ძლიერი საქართველოს“ ლიდერები: მამუკა ხაზარაძე, ბადრი ჯაფარიძე, ასევე, მამუკა კაციტაძე და მანანა ნაჭყებია.

როგორც სახელმწიფო აუდიტის სამსახურის მიერ გამოქვეყნებულ ინფორმაციაშია ნათქვამი, მიმდინარე წელს შემოწირულება მიღებული აქვს „თავისუფლების მოედანსაც“. პარტიას 2026 წლის 1-ელი იანვრიდან 16 თებერვლის ჩათვლით პერიოდში, 44 შემომწირველი ჰყავდა, რომელთაც ჯამში პარტიისთვის 46 745 ლარი გაიღეს. შემომწირველებს შორის არიან პარტიის ლიდერები: ლევან ცუცქირიძე, ბაკურ კვაშილავა და სიმონ ჯანაშია.

რაც შეეხება „კოალიციას ცვლილებებისთვის“, 2026 წლის 14 იანვრიდან 23 თებერვლის ჩათვლით, მათ შემოწირულების სახით 3460 ლარი მიიღეს. კოალიციას ამ პერიოდისთვის თანხა 8-ჯერ შესწირეს. შემომწირველებს შორისაა კოალიციის წევრი, მაია კოპალეიშვილი.

ოფიციალური მონაცემების მიხედვით, „გახარია საქართველოსთვის“ მიმდინარე წელს 2371 ლარი ჩაერიცხა. პარტიის შემომწირველებს შორისაა დეპუტატი თამარ ხვედელიანი.