ირანის ისლამური რევოლუციის გუშაგთა კორპუსმა (IRGC) 20 მარტს დაადასტურა, რომ პარასკევის დილის საათებში იერიშების შედეგად მოკლულია IRGC-ის სპიკერი, ალი მოჰამედ ნაინი.
ამის შესახებ ინფორმაცია ირანის სამთავრობო მედიამ, Tasnim-მა გაავრცელა და დაწერა, რომ ნაინი, რომელიც IRGC-ის სპიკერი 2024 წლიდან იყო, “მოწამებრივად აღესრულა”.
მანამდე ისრაელის თავდაცვის ძალებმა (IDF) გაავრცელა ინფორმაცია, რომ პარასკევს ისრაელმა თეირანში ახალი საჰაერო იერიშები წამოიწყო, რომლის სამიზნეც “ირანის ტერორისტული რეჟიმის ინფრასტრუქტურა” იყო.
მოჰამედ ნაინის დაღუპვის გამოცხადებამდე რამდენიმე წუთით ადრე მასზე დაყრდნობით წერდნენ, რომ მიმდინარე ომის მიუხედავად ირანი რაკეტების წარმოებას განაგრძობს.
ისრაელის პრემიერმინისტრმა ბენიამინ ნეთანიაჰუმ 19 მარტს პრესკონფერენციაზე განაცხადა, რომ ირანს აღარ აქვს ურანის გამდიდრებისა და ბალისტიკური რაკეტების წარმოების უნარი.