უნგრეთის პრემიერმინისტრმა, ვიქტორ ორბანმა განაცხადა, რომ ქვეყნის ტერიტორიაზე ჯარისკაცებს და ტექნიკას განათავსებს, რათა მნიშვნელოვანი ენერგეტიკული ინფრასტრუქტურა “პოტენციური უკრაინული საფრთხისგან” დაიცვას.
გადაწყვეტილება უკავშირდება “დრუჟბას” მილსადენს, რომელიც უნგრეთს უკრაინის გავლით რუსული ნედლი ნავთობით ამარაგებდა.
27 იანვარს უკრაინულმა მხარემ განაცხადა, რომ რუსული დრონის შეტევის შედეგად, “დრუჟბას” მილსადენის ინფრასტრუქტურა დაზიანდა, რის გამოც ნავთობის მიწოდება შეწყდა. მათი თქმით, მიმდინარეობის მილსადენის აღდგენის სამუშაოები.
უნგრეთი უკრაინას ადანაშაულებს მიწოდების განახლების პოლიტიკური მიზეზებით შეფერხებაში.
“ვხედავ, რომ უკრაინა ამზადებს შემდეგ ნაბიჯებს, რომლებიც მიზნად ისახავს უნგრეთის ენერგეტიკული სისტემის მუშაობის შეფერხებას. მე გავეცი ბრძანება კრიტიკული ენერგეტიკული ინფრასტრუქტურის დაცვის გაძლიერების შესახებ.”
უნგრეთი გეგმავს ჯარისა და ტექნიკის განთავსებას მნიშვნელოვან ობიექტებთან, ხოლო პოლიცია გააძლიერებს პატრულირებას ელექტროსადგურებთან, სადისტრიბუციო სადგურებთან და კონტროლის ცენტრებთან.
“დრუჟბას” მილსადენის მუშაობის შეფერხების გამო, უნგრეთმა და სლოვაკეთმა განაცხადეს უკრაინისთვის დიზელის ექსპორტის შეჩერების შესახებ და ასევე იმუქრებიან ელექტროენერგიისა და გაზის ექსპორტის შეწყვეტით.
ამასთან ერთად, უნგრეთმა ევროკავშირის მიერ უკრაინისთვის შეთანხმებული €90 მილიარდის სასესხო პაკეტი დაბლოკა.