რადიო თავისუფლების პროექტი Эхо Кавказа-ს ცნობით, ოკუპირებული აფხაზეთის ე.წ. თავდაცვის სამინისტრომ გაავრცელა განცხადება გაგრის რაიონში დრონის ჩამოვარდნისა და ფსოუს გამშვები პუნქტის მუშაობის დროებით შეჩერების შემდეგ.
ე.წ. სამინისტროში განაცხადეს, რომ საჰაერო თავდაცვისა და რადიოელექტრონული ბრძოლის მორიგე ძალები და საშუალებები “აღკვეთდნენ და მომავალშიც აღკვეთენ” უცნობი საფრენი აპარატების მიერ საჰაერო სივრცის ნებისმიერ დარღვევას.
“მოვუწოდებთ მოქალაქეებს, შეინარჩუნონ სიმშვიდე,” – ნათქვამია განცხადებაში.
ე.წ. უწყება ასევე მოუწოდებს მოსახლეობას, საფრენი აპარატების ჩამოვარდნის ადგილების ან მათი ფრაგმენტების აღმოჩენის შემთხვევაში, არ მიუახლოვდნენ ობიექტებს, არ შეეხონ მათ და დაუყოვნებლივ აცნობონ შესაბამის ე.წ. სამთავრობო ორგანოებს.
Эхо Кавказа წერს, რომ მედიის ინფორმაციით, 23 თებერვალს “გაგრის რაიონში, მამზიშხას მთის პირველ გადასახედ პუნქტთან, აფეთქება მოხდა;” “ტერიტორიის დათვალიერებისას აღმოჩენილია ნამსხვრევები, რომლებიც, წინასწარი ვერსიით, უპილოტო საფრენ აპარატს ეკუთვნის.”