მედიაჰოლდინგი ‘იმედი” მისმა ძველმა მფლობელმა ირაკლი რუხაძემ გაყიდა, მაგრამ ახალი მფლობელიც პროსახელისუფლო ბიზნესმენია, მეტიც, ის კადრებშია დაფიქსირებული კახა კალაძის საარჩევნო შტაბის ოფისთან მელიქიშვილის ქუჩაზე, სადაც მშვიდობიანი აქციის მონაწილეებზე ძალადობს. 

ჩვენ გვაქვს დიდი გეგმები, როგორც ტელეკომპანია „იმედთან“, ასევე მთლიანად ჰოლდინგთან მიმართებით, – ამის შესახებ ნათქვამია „იმედის“ ახალი მეწილის, „პრაიმ მედია გლობალის“ დამფუძნებელ ილია მიქელაიშვილის განცხადებაში.

მისივე მტკიცებით, დაცული იქნება არხის არსებული სარედაქციო პოლიტიკა და ჰოლდინგში მომუშავე თითოეული თანამშრომლის უფლებები.

„როგორც საზოგადოებისათვის ცნობილია, „პრაიმ მედია გლობალი“ წლებია ოპერირებს ქართულ მედიაბაზარზე და ქვეყანაში, ამ მიმართულებით, არის ერთ-ერთი მზარდი კომპანია. მოხარული ვარ, რომ წარმატებით დასრულდა მრავალთვიანი მოლაპარაკება ბიზნესმენ ირაკლი რუხაძესთან და შედეგად, ტელეკომპანია „იმედი“ და მისი ჰოლდინგის ქვეშ შემავალი სხვა მედიასაშუალებები ამიერიდან სწორედ „პრაიმ მედია გლობალის“ საკუთრებაში გადმოვა.

ჩვენ გვაქვს დიდი გეგმები, როგორც ტელეკომპანია „იმედთან“, ასევე მთლიანად ჰოლდინგთან მიმართებით. ვაპირებ სოლიდური ინვესტიციის განხორციელებას და არხის კიდევ უფრო გაძლიერებას.

მეორე მხრივ, სრული პასუხისმგებლობით ვაცხადებ, რომ დაცული იქნება არხის არსებული სარედაქციო პოლიტიკა და ჰოლდინგში მომუშავე თითოეული თანამშრომლის უფლებები. ჩვენ სრულად ვიაზრებთ იმ პასუხისმგებლობას, რომ „იმედი“ არის უპირობო ლიდერი ქართულ მედიასივრცეში და ჩვენი მიზანია ამ შედეგის გაფრთხილება და კიდევ უფრო გაუმჯობესება. ეს არის, რაც ამ ეტაპზე შემიძლია გითხრათ, დეტალურად კი ჩვენი გეგმების შესახებ ოდნავ მოგვიანებით ვისაუბრებ“, – ნათქვამია ილია მიქელაიშვილის განცხადებაში, რომელსაც „იმედი“ ავრცელებს.

ცნობისთვის, ბიზნესმენმა ირაკლი რუხაძემ „ტელე-იმედიდან“ „ჰანიველ პარტნერსის“ გასვლის შესახებ განცხადება გაავრცელა. როგორც რუხაძე აღნიშნავს, „პარტნიორებთან გრძელი და დაძაბული კონსულტაციების შემდეგ, გადავწყვიტეთ, რომ დღევანდელ სიტუაციაში, ყველაზე გონივრული გამოსავალი არის ჩვენი „იმედთან“ დამშვიდობება“.

მისივე თქმით, „პრაიმ მედია გლობალი“, რომელიც მრავალი წელია თანამშრომლობს „იმედთან“ რეკლამის გაყიდვაზე, ეს კომპანია შეიძენს „იმედის“ 50%-ს და 50% გადავა „იმედის“ გენერალური დირექტორის, მაკა ლომიძისა და მისი 4 მოადგილის მფლობელობაში.

ამასთან, როგორც bpn.ge წერს, ტელეკომპანია „იმედის“ მფლობელი კომპანია სიმბოლურ ფასად – 1000-ლარად გაიყიდა.

„სამეწარმეო რეესტრის, ბოლო მონაცემებით, „იმედის“ მფლობელი კომპანია „ჯორჯიან მედია პროდაქშენ გრუპია“ („ჯიდიესი“).

აღსანიშნავია, რომ „ჯორჯიან მედია პროდაქშენ გრუპი“ „პრაიმ მედია გლობალმა“ იყიდა. ამ უკანასკნელი კომპანიის მესაკუთრე ილია მიქელაიშვილია, რაც იმას ნიშნავს, რომ სწორედ მიქელაიშვილი იქნება „იმედის“ საბოლოო მფლობელი“, – წერს გამოცემა.