საქართველოს მართლმადიდებელი ეკლესია დღეს ნათლისღების დღესასწაულს აღნიშნავს. ამასთან დაკავშირებით ტაძრებში სადღესასწაულო წირვა-ლოცვა და წყალკურთხევის წესი ტარდება, რის შემდეგაც მორწმუნეებს ნაკურთხი წყლის სახლში წაღება შეუძლიათ.
საეკლესიო სწავლებით, ნაკურთხ წყალს იორდანეს მადლი ენიჭება და იგი სულიერი და ფიზიკური განსაცდელების დროს გამოიყენება. ნათლისღება თორმეტ საუფლო დღესასწაულს შორის ერთ-ერთია და ასევე ღვთის გამოცხადების დღედ იწოდება, რადგან ამ დღეს წმინდა სამება გაცხადდა.
სახარების მიხედვით, იესო ქრისტე მდინარე იორდანეში წმინდა იოანე ნათლისმცემელმა მონათლა, რა დროსაც მასზე სულიწმინდა მტრედის სახით გარდამოვიდა და ზეციდან ხმა გაისმა.