უკრაინის პრეზიდენტმა ვოლოდიმირ ზელენსკიმ ტყუილი უწოდა რუსული მხარის განცხადებას, რომ უკრაინამ დრონებით ვლადიმირ პუტინის რეზიდენციაზე იერიში მიიტანა. ზელენსკის თქმით, ამის შესახებ უკრაინა ამერიკულ მხარეს უკვე ელაპარაკა.
“ჩვენი მომლაპარაკებელი ჯგუფი ამერიკულ მხარეს დაუკავშირდა, მათ განიხილეს დეტალები და გვესმის, რომ ეს ფეიკია. რა თქმა უნდა, ჩვენს პარტნიორებს, მათი ტექნიკური შესაძლებლობების წყალობით, ყოველთვის შეუძლიათ იმის გადამოწმება, რომ ეს ფეიკია.” – აღნიშნა მან.
ზელენსკის თქმით, “პუტინის ვალდაის რეზიდენციაზე თავდასხმები ტყუილია. არავინ დასხმია თავს. არის ეს სანქციებთან კავშირში. შესაძლოა, მცირედით ამასაც ეხებოდეს.”
“მაგრამ ჩემი აზრით, უფრო იმ ფაქტთანაა კავშირში, რომ ჩვენ საკმაოდ წარმატებული საუბარი და შეხვედრა გვქონდა, პოზიტიური შეხვედრა ჩვენს ჯგუფებს შორის ერთი თვის განმავლობაში, რომელიც პრეზიდენტ ტრამპთან ჩვენი შეხვედრით დაგვირგვინდა, სადაც ჩვენ განვიხილეთ გეგმა, რომელზეც ჩვენი მრჩევლები 3 იანვრიდან მოყოლებული მუშაობდნენ.” – დაამატა უკრაინის პრეზიდენტმა.
ცნობისთვის, უკრაინის პრეზიდენტმა, ვოლოდიმირ ზელენსკიმ 29 დეკემბერს უკრაინის მიერ ვლადიმირ პუტინის რეზიდენციაზე იერიშის მიტანის შესახებ რუსეთის საგარეო საქმეთა მინისტრის, სერგეი ლავროვის განცხადება უარყო.
ზელენსკიმ სოციალურ ქსელში დაწერა, რომ რუსეთი, აშშ-ს პრეზიდენტ დონალდ ტრამპის ინიციატივით მიმდინარე სამშვიდობო მოლაპარაკებებში მიღწეული შედეგების ჩასაშლელად, ცრუ ამბავს იგონებდა.
ტრამპმა დაამატა, რომ აშშ რუსეთის მიერ გავრცელებულ ინფორმაციას, თითქოს უკრაინა პუტინის რეზიდენციას თავს დაესხა, შეისწავლიდა – “შეიძლება თავდასხმა საერთოდ არც მომხდარა”. – აღნიშნა ტრამპმა.