უნგრეთის პრემიერმინისტრმა ვიქტორ ორბანმა რუსეთ-უკრაინის ომთან დაკავშირებით განაცხადა, რომ “ცხადი არ არის, ვინ ვის დაესხა თავს” და კიდევ ერთხელ გამოხატა წინააღმდეგობა უკრაინის დასახმარებლად გაყინული რუსული აქტივების გამოყენებასთან დაკავშირებით.
ორბანის თქმით, მცდარია დასავლეთის ქვეყნებს შორის არსებული ის წარმოდგენა, რომ ამ ომში გამარჯვება ფულის დახარჯვის გარეშე შეიძლება და რომ, ომის ბოლოს, ხარჯი რუსეთის მიერ დაიფარება კომპენსაციის სახით.
“ისინი მშვიდად საუზმობენ სახლში, ყავას სვამენ და ფიქრობენ, თუ რამდენადაა მორალურად გამართლებული, რომ პატარა ქვეყანას დაეხმარო, რომელსაც თავს დაესხნენ, თუმცა, ის არც ისე პატარაა და არც ის არის ცხადი, ვინ ვის დაესხა თავს, მაგრამ, ნებისმიერ შემთხვევაში, ჩვენ ახლა ვეხმარებით ქვეყანას, რომელიც ძალადობის მსხვერპლია და არაფერი გვიჯდება. მაგრამ საბოლოოდ, გადახდა მათ [დასავლეთის ქვეყნებს] მოუწევთ.” – ციტირებს ორბანს უნგრული მედია.