უახლესი ინფორმაციით, ავსტრალიის ქალაქ სიდნეიში ებრაული დღესასწაულის, ხანუქას ღონისძიებაზე მომხდარ ტერორისტულ თავდასხმას, სულ მცირე, 11 ადამიანი ემსხვერპლა, 29 ადამიანი კი საავადმყოფოში არის გადაყვანილი. თავდასხმის დროს ასევე მოკლულია ერთ-ერთი ტერორისტიც, მეორე კი კრიტიკულ მდგომარეობაში იმყოფება.

ახალი სამხრეთ უელსის შტატის პრემიერის, ქრის მინსის თქმით, გამოძიება დაიწყო და “მასობრივი” და “კომპლექსური” იქნება.

შტატის პოლიციის უფროსმა, მელ ლანიონმა თქვა, რომ თავდასხმის შემდეგ საავადმყოფოში, სულ მცირე, 29 ადამიანი არის გადაყვანილი, მათ შორის, 2 პოლიციელი, რომელთა მდგომარეობა მძიმეა.

ადგილობრივმა პოლიციამ ორი თავდამსხმელი დააკავა და მესამე თავდამსხმელის შესაძლო მონაწილეობას იკვლევს. სამართალდამცავებმა განაცხადეს, რომ თავდასხმა ტერაქტი იყო. მათივე ცნობით, ტერაქტის დროს ებრაულ ღონისძიებას 1 000-ზე მეტი ადამიანი ესწრებოდა.

ლანიონმა ასევე თქვა, რომ ამჟამად პოლიციის ბომბების გამაუვნებელი დანაყოფი თავდასხმის ადგილთან ახლოს მანქანაზე მუშაობს, რომელშიც შესაძლოა ასაფეთქებელი მოწყობილობები იყოს.

ავსტრალიის პრემიერმინისტრმა, ენტონი ალბანეზიმ, ტერაქტთან დაკავშირებით X-ზე განცხადება გაავრცელა და თავდასხმის კადრებს “შოკისმომგვრელი და შემაძრწუნებელი” უწოდა.

“ჩემი ფიქრები არის ყველა დაზარალებულ პირთან”. – თქვა ალბანეზიმ.

თავდასხმას ასევე გამოეხმაურა ისრაელის პრეზიდენტი, ისააკ ჰერცოგი. მან მიუსამძიმრა “სიდნიში ებრაელ დებსა და ძმებს, რომლებსაც საზიზღარი ტერორისტები თავს დაესხნენ, როდესაც მათ ხანუქას პირველი სანთელი უნდა აენთოთ”.

ჰერცოგმა ასევე აღნიშნა, რომ ისრაელმა ავსტრალიის მთავრობას ანტისემიტიზმის წინააღმდეგ მოქმედებისკენ არაერთხელ მოუწოდა.

“ავსტრალიის მთავრობას არაერთხელ მოვუწოდეთ, რომ იმოქმედონ და ებრძოლონ ანტისემიტიზმის უზარმაზარ ტალღას, რომლითაც ავსტრალიის საზოგადოება არის დაავადებული”. – წერს ჰერცოგი.