“აქ რა მინდა არ ვიცი, არანაირი სამართალდარღვევა არ ჩამიდენია”- ამის შესახებ პროფესიული მოვალეობის შესრულების დროს დაკავებულმა გიორგი მამნიაშვილმა საკუთარ სასამართლო პროცესზე განაცხადა.
TV პირველის კორესპოდენტის თქმით, ის იმ დროს დააკავეს, როცა აქციაზე დაკავებებს აშუქებდა და რედაქციას ფაქტის ამსახველ ვიდეო-მასალას აწვდიდა.
დაკავებული აღნიშნავს, რომ მისი განეიტრალების ბრძანება ვაკე-საბურთალოს პოლიციის უფროსმა, ლაშა სალუქვაძემ გასცა. ჟურნალისტი იმ ტელეფონის გასხნას და დათვალიერებას ითხოვს, რომლის მეშვეობითაც დედაქალაქის მთავარ გამზირზე მიმდინარე პროცესებს აშუქებდა.
პირველი – აქ რა მინდა, არ ვიცი, სამართალდარღვევა არ ჩამიდენია. პროფესიულ მოვალეობას ვასრულებდი. პრესბარათი ვაჩვენე დაკავებისას [პოლიციას] და ვუთხარი, რომ ჟურნალისტი ვიყავი… დაკავების მომენტში ვიღებდი სხვა დაკავებულების ვიდეოს, რომლებიც ჩემს წინ დააკავეს: ცოტნე მირცხულავა და თუ არ ვცდები ლუკა ჭოხონელიძე, რომლებსაც მივყვებოდი ტელეფონით. ვიდეოს გაგზავნა ვერ მოვასწარი [რედაქციაში], ჩემი დაკავებაც ამ ვიდეოზეა ასახული. გამითიშეს ტელეფონი.
რომლის გადაღებაც და გაგზავნაც მოვახერხე ჩათში, იყო მარიამ მეყანწიშვილის დაკავება. ამის შემდეგ ცოტნე და ლუკა დააკავეს, ამათ მივყვებოდი კადრით, სამართალდამცველმა ჩემი ტელეფონის დაგდება სცადა, რომელიც კადრშიც ჩანს, დაინახვდით ალბათ, ამის შემდეგ ისმის ლაშა სალუქვაძის წამოძახილი – ეგეც მიაყოლეთ თუ ეგეც დააკავეტო, რაც ჩემს ვიდეოშიც ისმის, დარწმუნებული ვარ”- თქვა მამნიაშვილმა.