აშშ-ს და რუსეთის ოფიციალური პირებმა Axios-ს უყვებიან, რომ რუსეთ-უკრაინის ომის დასასრულებლად ვაშინგტონი და მოსკოვი დახურულ კარს მიღმა ახალ სამშვიდობო გეგმაზე მუშაობენ.

ერთ-ერთი ამერიკელი ოფიციალური პირის მიხედვით, აშშ-ს პრეზიდენტის სპეციალურმა წარმომადგენელმა, სტივ უიტკოფმა და რუსეთის წარმომადგენელმა, კირილ დმიტრიევმა ახალი 28-პუნქტიანი სამშვიდობო გეგმა დეტალურად განიხილეს.

დმიტრიევმა Axios-თან ინტერვიუში გეგმა ოპტიმისტურად დაახასიათა და აღნიშნა, რომ წინა შემთხვევებისგან განსხვავებით, “ვგრძნობთ, რომ რუსეთის პოზიცია ნამდვილად ისმის”.

გამოცემა წერს, რომ სამშვიდობო გეგმა ოთხი ძირითადი პუნქტისგან შედგება: მშვიდობა უკრაინაში, უსაფრთხოება ევროპაში, უსაფრთხოების გარანტიები და აშშ-ს ურთიერთობები კიევსა და მოსკოვთან მომავალში.

დმიტრიევის თქმით, ის უიტკოფსა და თეთრი სახლის ადმინისტრაციის სხვა მაღალი რანგის წევრებს მაიამიში 24-26 ოქტომბერს შეხვდა.

“ეს სინამდვილეში ბევრად უფრო ფართო ჩარჩოა, რომელიც არსებითად განიხილავს – ‘როგორ შევქმნათ საბოლოოდ ხანგრძლივი უსაფრთხოება ევროპისთვის და არა მხოლოდ უკრაინისთვის’“ – თქვა დმიტრიევმა.

უკრაინელი ოფიციალური პირების მიხედვით. უკრაინის ეროვნული უშიშროებისა და თავდაცვის საბჭოს მდივანმა, რუსტემ უმეროვმა სტივ უიტკოფთან მაიამიში გამართულ შეხვედრაზე აღნიშნული სამშვიდობო გეგმა უკვე განიხილა.

Axios-ს ინფორმირებული წყარო უყვება, რომ თეთრმა სახლმა ახალი სამშვიდობო გეგმის შესახებ უკრაინელი და ევროპელი ოფიციალური პირების ინფორმირება უკვე დაიწყო.