Bloomberg-ის მიხედვით, 12 ნოემბერს ჩაწერილ ინტერვიუში, უკრაინის პრეზიდენტი, ვოლოდიმირ ზელენსკი ამბობს, რომ უკრაინამ აშშ-სთან ერთად ჰაერსაწინააღმდეგო რაკეტების წარმოება დაიწყო.

“ეს არის ამერიკულ-უკრაინული წარმოება. იმედი მაქვს, მომავალში კიდევ უფრო მეტი იქნება”– Bloomberg ციტირებს უკრაინის პრეზიდენტს.

მანამდე, 9 ნოემბერს ზელენსკიმ გამოცემა The Guardian-თან ინტერვიუში თქვა, რომ უკრაინას ამერიკული კომპანიებისთვის 27 ერთეული Patriot-ის საჰაერო თავდაცვის სისტემის შეკვეთა სურს და მანამდე აპირებს, რომ ეს სისტემები ევროპელი მოკავშირეებისგან ისესხოს.

ბოლო კვირების განმავლობაში რუსეთმა უკრაინის ენერგო ინფრასტრუქტურაზე დარტყმები გააძლიერა. 8 ნოემბერს რუსეთის იერიშების შედეგად დროებით მწყობრიდან იყო გამოსული სახელმწიფო ენერგოკომპანია “ცენტრენერგოს” მიერ მართული ყველა თბოელექტროსადგური.

ზელენსკის თქმით, ამ რთული ვითარების გამო, უკრაინის მოკავშირეებმა ქვეყნის მხარდაჭერა უფრო აქტიურად უნდა გააგრძელონ. “ეს არასდროს არის საკმარისი. საკმარისი იქნება მაშინ, როცა ომი დასრულდება, როცა პუტინი მიხვდება, რომ უნდა შეწყვიტოს ეს ყველაფერი,” აღნიშნა მან.

ზელენსკიმ აგრეთვე თქვა, რომ ვაშინგტონში მისი ოქტომბრის ვიზიტი წარმატებული იყო და რომ მას აშშ-ს პრეზიდენტ დონალდ ტრამპთან კარგი ურთიერთობა აქვს, მიუხედავად იმისა, რომ “მსოფლიოში ტრამპის ბევრს ეშინია”.