ენერგორესურსებით მოვაჭრე შვეიცარიულმა კომპანიამ, Gunvor-მა 6 ნოემბერს განაცხადა, რომ რუსული ნავთობკომპანია Lukoil-ის უცხოური აქტივების შესყიდვაზე წინადადება უკან წაიღო მას შემდეგ, რაც აშშ-ს სახაზინო დეპარტამენტმა მას კრემლის “მარიონეტი” უწოდა და მიანიშნა, რომ ვაშინგტონი მსგავს გარიგებას ეწინააღმდეგებოდა.
“პრეზიდენტმა ტრამპმა მკაფიოდ თქვა, რომ ომი დაუყოვნებლივ უნდა შეწყდეს. სანამ პუტინი უაზრო მკვლელობებს განაგრძობს, კრემლის მარიონეტი Gunvor ვერასდროს მიიღებს ოპერირებასა და მოგების ნახვაზე ლიცენზიას.” – დაწერა აშშ-ს სახაზინო დეპარტამენტმა.
Gunvor-ის კორპორაციულ საქმეთა დირექტორმა, სეთ პიეტრასმა განაცხადა, რომ სახაზინოს მიერ გაკეთებული განცხადება “ფუნდამენტურად არასწორად ინფორმირებული და მცდარია” და დაამატა, რომ კომპანია მიესალმება “შესაძლებლობას, რათა უზრუნველყოს ამ აშკარა გაუგებრობის შესწორება.”
“ამავდროულად, Gunvor-ს უკან მიაქვს Lukoil-ის საერთაშორისო აქტივებზე წამოყენებული წინადადება,” თქვა პიეტრასმა.
ცნობისთვის, Gunvor-ის თანადამაარსებელი პუტინის ერთ-ერთი უახლოესი მოკავშირე, რუსი ოლიგარქი გენადი ტიმჩენკოა, რომელმაც კომპანიის წილი 2014 წელს, Gunvor-ის წინააღმდეგ აშშ-ს სანქციების ამოქმედებამდე ერთი დღით ადრე, გაყიდა და მას შემდეგ კომპანია მოსკოვისგან თავის შორს დაჭერას ცდილობს.
თუმცა, აშშ-ს სახაზინო დეპარტამენტს წარსულში ხაზგასმული აქვს, რომ პუტინს Gunvor-ში ინვესტიციები აქვსს ჩადებული და შესაძლოა ასევე ჰქონდეს წვდომა Gunvor-ის ფინანსებზეც, რასაც თავად კომპანია უარყოფს.
22 ოქტომბერს აშშ-ს პრეზიდენტმა, დონალდ ტრამპმა ვლადიმირ პუტინთან დაგეგმილი შეხვედრა გააუქმა და რუსეთ-უკრაინის ომთან დაკავშირებით ორ უმსხვილეს რუსულ ნავთობკომპანიას, Lukoil-სა და Rosneft-ს, სანქციები დაუწესა.