რუსთაველის გამზირზე მყოფი აქციის მონაწილეების თქმით, გზის გადაკეტვის ბრალდებით დაკავებულ სხვა პირებთან ერთად, პოლიციელებმა ფიზიკური ძალის გამოყენებით დააკავეს 71 წლის, გაგრიდან დევნილი აზა ჩილაჩავა.
როგორც აზას მეგობრები და თანამოაზრეები წერენ, სასამართლო ორშაბათს ჩაინიშნა, მანამდე კი აზა ჩილაჩავას ხელწერილით გაშვებაზე უარი უთხრეს და დიღმის იზოლატორში შეასახლეს:
“დიღმის იზოლატორთან 15-დე ადამიანი ვდგავართ. გოტა ჭანტურია მაჩვენებს აკურატულად დაკეცილ 50 ლარიანს. აზამ მაჩუქა და ასე დამაქვსო. დევნილმა აჩუქა თვეში 45 ლარიანი დახმარებით. ვასკა ივანოვ-ჩიქოვანი რომ მოვიდა, იზოლატორის მიმართულებით დაიძახა, “დოქსოპულო, შენ დედა გყავს”? პასუხი არაა. ზოგი მწარედ ხუმრობს, დევნილი ქალი კუთვნილი ბინის ნაცვლად სახელმწიფომ იზოლატორში შეასახლაო. ადვოკატები გამოვიდნენ. აზამ მშრალი შიმშილობა დაიწყოო. მხნედაა და თქვენზე ღელავსო. სასამართლო წესით ხვალ იქნება”, – წერს დათა სიმონია.
ადვოკატი და სამოქალაქო აქტივისტი მარიკა არევაძე კი, რომელმაც აზა ჩილაჩავა მოინახულა, წერს: “შემაძრწუნებელი სანახავი იყო, როგორ მოყავთ ბებო და გისოსებს მიღმა მის გულზე ჩანს წარწერა “გაგრა”. აზა მხნედ არის, უშიშრად, როგორც სჩვევია. დაიწყო შიმშილობა, ბევრი თხოვნის მიუხედავად, აზრი ვერ შევაცვლევინეთ (შიმშილობა წყლის გარეშე)”.
კიდევ ერთი აქტივისტი და პროტესტის მონაწილე საბა ბრაჭველი:
“71 წლის, აფხაზეთიდან დევნილ, გაგრაში ქართველების გვამების მომვლელ და მიწას მიმბარებელ ქალს, აზა ჩილაჩავას, პოლიციელები აქციებზე დასცინოდნენ (“აფხაზეთიდან არ ხარ”, “თვალითაც არ გაქვს ნანახი”), ფეხითაც შედგნენ და გადაუარეს (ახალგაზრდას როცა გადაეფარა) და ახლა პოლიციის მთელმა ათეულმა (მეტმაც) დააკავა. რუსებისა და აფხაზების არ შეშინებია აზას, ვერც ესენი შეაჩერებენ და, პენსიონერი ზურაბ მენთეშაშვილის მსგავსად, შეიძლება ერთწლიანი პატიმრობა დაემუქროს.