საქართველოს მესამე პრეზიდენტის, მიხეილ სააკაშვილის შეფასებით, ქვეყანაში დღეს საგარეო პოლიტიკა ფაქტობრივად აღარ არსებობს. როგორც ის აღნიშნავს, საქართველოს სხვადასხვა პერიოდის ისტორიაში, გამსახურდიას, შევარდნაძისა და მისი მმართველობის წლებში, ქვეყანა საერთაშორისო ასპარეზზე აქტიურ მოთამაშედ აღიქმებოდა, თუმცა ახლა სახელმწიფოს ერთ-ერთ მთავარ ატრიბუტს, საგარეო პოლიტიკას, მთლიანად დაკარგულად მიიჩნევს.
საქართველოს ჰქონდა საგარეო პოლიტიკა გამსახურდიას დროს, ბევრად მეტი შევარდნაძის პრეზიდენტობისას, ჩემ დროს საქართველო გადაიქცა მნიშვნელოვან საერთაშორისო მოთამაშედ.
ახლა საქართველოს საგარეო პოლიტიკის შეფასება შეუძლებელია – რაც არ არსებობს, იმას ვერ შეაფასებ. შესაძლებელია მხოლოდ საქართველოს საგარეო პოლიტიკის სიკვდილის კონსტატირება.
საქმე იმაშია, რომ საბჭოთა კავშირის დროს საქართველოს სსრ-ს ჰქონდა საგარეო საქმეთა სამინისტრო. ის განთავსებული იყო მაშინდელი პლეხანოვის ძველებური შენობის რამდენიმე ოთახში. მინისტრს ერქვა გოგი ჯავახიშვილი.
როგორც კიევის უნივერსიტეტის საერთაშორისო ურთიერთობების ინსტიტუტის სტუდენტმა, მეც გავიარე ორთვიანი სტაჟირება იქ. სტაჟირების დროს დავრწმუნდი, რომ სამინისტრო საერთოდ არაფერს აკეთებდა.
დღესაც, საქართველოს, როგორც მაშინ, აქვს საგარეო საქმეთა უწყება, რომელიც უფრო დიდ ძველებურ შენობაში იმყოფება და როგორც მაშინ, ის არაფერს აკეთებს.
საქართველოს აღარ გააჩნია სახელმწიფოებრიობის ერთ-ერთი უმთავრესი ატრიბუტი, საგარეო პოლიტიკა, ის გარდაიცვალა“,- წერს მიხეილ სააკაშვილი.