მას შემდეგ, რაც ცნობილი გახდა, რომ ლუქსემბურგში დაგეგმილ მინისტერიალზე არ არის მიწვეული საქართველოს საგარეო საქმეთა მინისტრი და საქართველო მხოლოდ ელჩის დონეზე იქნება წარმოდგენილი, საგარეო საქმეთა სამინსიტრომ გაავრცელა განცხადება, სადაც აღნიშნა, რომ მინისტერიალში საქართველო საერთოდ არ მიიღებს მონაწილეობას, რადგან ამგვარ შეხვედრაზე ელჩის დონეზე მიწვევა გაუგებარია:
“დაკავშირებადობის საკითხებზე მინისტერიალში, რომელიც 20 ოქტომბერს ლუქსემბურგში იგეგმება და რომელში მონაწილეობის მისაღებადაც ევროკავშირის საგარეო ქმედებათა სამსახური იწვევს ცენტრალური აზიის და აღმოსავლეთ პარტნიორობის ქვეყნების – სომხეთის, აზერბაიჯანის, თურქეთის, თურქმენეთის, უზბეკეთის, ტაჯიკეთის, ყაზახეთის, ყირგიზეთის საგარეო საქმეთა მინისტრებს, საქართველო ელჩის დონეზე არ მიიღებს მონაწილეობას.
საკითხის მნიშვნელობიდან და დაკავშირებადობის საკითხებში საქართველოს როლიდან გამომდინარე, მინისტრების შეხვედრაში საქართველოს ელჩის დონეზე მიწვევა მიუღებელია და გაუგებარია ამგვარი მიდგომის საფუძველი და მიზეზი” – ამბობენ საგარეო უწყებაში.
დღეს გავრცელდა ინფორმაცია, რომ მაკა ბოჭორიშვილი ლუქსემბურგში საგარეო საქმეთა მინისტერიალზე არ მიიწვიეს – ამის შესახებ რადიო თავისუფლების ევროპის ბიუროს რედაქტორმა, რიკარდ იოზვიაკმა პლატფორმა X-ზე დაწერა და განმარტა, რომ საქართველო ელჩის დონეზე იქნებოდა მიწვეული.