პარასკევს ევროპულმა კომისიამ დაამტკიცა რუსეთის ფედერაციის წინააღმდეგ ახალი, მე-19 სანქციების პაკეტი.
ამის შესახებ ბრიუსელში გამართულ ბრიფინგზე ჟურნალისტებს ევროკომისიის წარმომადგენელმა პაულა პინიომ აცნობა, იუწყება „უკრინფორმის“ კორესპონდენტი.
„შემიძლია, დავადასტურო, რომ კომისიამ დღეს დაამტკიცა რუსეთის წინააღმდეგ მე-19 სანქციების პაკეტი,“ – განაცხადა სპიკერმა.
პაკეტის დეტალები დღეს შუადღის შემდეგ იქნება გამოცხადებული ევროკომისიის პრეზიდენტის, ურსულა ფონ დერ ლაიენისა და ევროკავშირის საგარეო და უსაფრთხოების პოლიტიკის უმაღლესი წარმომადგენლის, კაია კალასის მიერ.
როგორც „უკრინფორმი“ იუწყება, ივლისში ევროკომისიამ წარადგინა საკანონმდებლო წინადადება, რომელიც მიზნად ისახავს 2027 წლამდე ევროკავშირის რუსეთის ენერგომატარებლებზე დამოკიდებულების სრულ შეწყვეტას. გარდა ამისა, მანამდე დონალდ ტრამპმა ნატოს მოკავშირეებს მოუწოდა, შეეწყვიტათ ნავთობის იმპორტი რუსეთიდან.
ევროკომისიის პრეზიდენტმა ურსულა ფონ დერ ლაიენმა აღნიშნა, რომ კომისია შესთავაზებს ევროკავშირის მიერ რუსეთის ნავთობისა და გაზის ეტაპობრივი უარყოფის პროცესის დაჩქარებას, ხოლო მომდევნო სანქციების პაკეტი, მათ შორის, შეეხება რუსეთის კრიპტოაქტივებს, საბანკო და ენერგეტიკულ სფეროს.
აშშ თავის მოკავშირეებზე „დიდ შვიდეულში“ ახდენს ზეწოლას, რათა მათ დააწესონ ტარიფები ჩინეთსა და ინდოეთზე 100%-მდე, რადგან ისინი აგრძელებენ რუსეთის ნავთობის შეძენას. მოსალოდნელია, რომ ეს მოთხოვნა ბლოკის რამდენიმე დედაქალაქში წინააღმდეგობას წააწყდება. ამ დროისთვის G7-ის წარმომადგენლები მუშაობენ წინადადებების პაკეტზე, რომლის დასრულებასაც მომდევნო ორი კვირის განმავლობაში გეგმავენ.