საქართველოს სტატისტიკის ეროვნული სამსახურის მონაცემებით, 2025 წლის II კვარტალში საქართველოში უმუშევრობის დონე წინა წლის შესაბამის პერიოდთან შედარებით 0.6%-ით გაიზარდა და 14.3% შეადგინა.

მათივე ცნობით, 2025 წლის II კვარტალში წინა წლის შესაბამის პერიოდთან შედარებით დაქირავებულთა რაოდენობა გაიზარდა 4.7 ათასი კაცით (0.5%) და 940.5 ათასს მიაღწია, ხოლო თვითდასაქმებულთა რაოდენობა 29.3 ათასით შემცირდა (6.5%) და 422.2 ათასი შეადგინა. ამავე პერიოდში უმუშევართა რაოდენობა გაიზარდა 7.9 ათასით (3.6%) და 227.6 ათასი შეადგინა.

საქსტატის მონაცემების თანახმად, დასაქმების დონე ქალაქის ტიპის დასახლებებში 1.4%-ით შემცირებულია და 46.5%-ს შეადგენს. ხოლო სოფლის ტიპის დასახლებებში გაზრდილია 0.5%-ით და 46.3%-ს შეადგენს.

რაც შეეხება უმუშევრობის დონეს, 2025 წლის II კვარტალში, წინა წლის შესაბამის პერიოდთან შედარებით, უმუშევრობის დონე საქალაქო ტიპის დასახლებებში გაზრდილია 2.1%-ით, ხოლო სოფლის ტიპის დასახლებებში შემცირებულია 1.5%-ით.

უწყების ცნობით, უმუშევრობის დონე ტრადიციულად მაღალია კაცებში, ქალებთან შედარებით. 2025 წლის II კვარტალში, წინა წლის შესაბამის პერიოდთან შედარებით, აღნიშნული მაჩვენებელი 1.3%-ით არის გაზრდილი ქალებში და 12.2%-ს შეადგენს, ხოლო კაცებში უცვლელი დარჩა და 15.9%-ია.

2025 წლის II კვარტალში, წინა წლის შესაბამის პერიოდთან შედარებით, დასაქმების დონე ქალებში შემცირებულია 1.2%-ით, ხოლო კაცებში გაზრდილია 0.1%-ით.