საბერძნეთის რეგიონები მეორე დღეა იწვის – განუწყვეტელი ევაკუაცია მიმდინარეობს პატრასში, ზაკინთოსა და პრევეზაში. ცეცხლი სახლებთან რამდენიმე მეტრშია, ზოგი მოსახლე საკუთარი ხელებით ცდილობს უკონტროლო ხანძართან გამკლავებას.
ხანძრის უზარმაზარი კერები მძვინვარებს ახაიაში, პრევეზასა და ზაკინთოსზე, საიდანაც ხალხი უწყვეტად გამოჰყავთ, რადგან მათი სიცოცხლე საფრთხეშია.
საერთო ჯამში საბერძნეთში ხანძარმა 100.000 ჰექტარს გადაუარა, გამოწვეულია კატასტროფული ზარალი, არა მხოლოდ მატერიალური თვალსაზრისით, არამედ ბუნებრივი გარემოს განადგურების კუთხითაც.
აღსანიშნავია, რომ ხალხის ევაკუაცია განხორციელდა პატრას ოთხი დასახლებიდანაც, ხალხს ქალაქის ცენტრისკენ გადაადგილებისკენ მოუწოდეს.
ხანძრები იმდენად მასშტაბურია, რომ მეხანძრეთა და მოხალისეთა რაოდენობა ფიზიკურად არ არის საკმარისი, რომ ყველგან განაწილდნენ, რადგან ამ ადამიანების რესურსი, თავის მხრივ, ცხადია, განუსაზღვრელი არ არის.