თბილისის საქალაქო სასამართლოში მანდატურზე თავდასხმის ბრალდებით დაკავებული აქტივისტის, ნინო დათაშვილის სასამართლო პროცესი მიმდინარეობს.

სხდომას ესწრება ბრალდებული დათაშვილიც. ასევე, სასამართლო პროცესზე იმყოფებიან გერმანიის, დანიის, ნიდერლანდებისა და ევროკავშირის საელჩოს წარმომადგენლები.

დათაშვილს დარბაზში მსხდომი პირები ტაშითა და ოვაციებით შეხვდნენ.

დღევანდელ სასამართლო პროცესზე მტკიცებულებების დასაშვებობაზე იმსჯელებენ, ამასთან, დათაშვილის მიმართ შეფარდებული აღკვეთის ღონისძიება პატიმრობა გადაისინჯება.

დავაყენებთ სხვა შუამდგომლობებს, მათ შორის, სასამართლოს აცილების შუამდგომლობას, რადგან დაცვის მხარეს მიაჩნია, იმ პირობებში, როცა სასამრთლომ უნდა განიხილოს ის სისხლის სამართლის საქმე, სადაც ბრალდების მხარის ყველა მოწმე არის მისი თანამშრომელი, ჩნდება გონივრული ეჭვი, სასამართლოს ობიექტურობასთან დაკავშირებით. ჩვენ განჩინება არ ჩაგვბარებია, თუმცა, როგორც ჩემთვის ცნობილია, სააპელაციომ ძალაში დატოვა სასამართლოს უკანონო გადაწყვეტილება,- განაცხადა თამარ გაბოძემ.

ნინო დათაშვილი თბილისის საქალაქო სასამართლოში 9 ივნისს მომხდარი ფაქტის გამო 20 ივნისს დააკავეს. მას ბრალდება საქართველოს სისხლის სამართლის კოდექსის 353-ე სეკუნდა მუხლის მე-3 ნაწილით წარედგინა, რაც საჯარო მოსამსახურეზე თავდასხმას მის მიერ სამსახურებრივი მოვალეობის შესრულების დროს გულისხმობს.

აღნიშნული სასჯელის სახედ და ზომად ჯარიმას, ან 4-დან 7 წლამდე თავისუფლების აღკვეთას ითვალისწინებს.