პარლამენტმა, რომელსაც ოპოზიცია და საერთაშორისო საზოგადოება ლეგიტიმაციას არ აძლევს, “სიტყვისა და გამოხატვის თავისუფლების” შესახებ კანონი პირველი მოსმენით მიიღო. კანონპროექტს მხარი დაუჭირა 85-მა დეპუტატმა.

აღნიშნული კანონი გავრცელდება როგორც პირისპირ, ასევე საჯარო სივრცეებში შეურაცხყოფაზეც.

“ქართულმა ოცნებამ” კანონპროექტში ცვლილებები შეიტანა – კანონპროექტით ცილისწამება ზუსტდება, როგორც – არსებითად მცდარი ფაქტის შემცველი და პირის სახელის გამტეხი განცხადება.

სიტყვისა და გამოხატვის თავისუფლების შესახებ მოქმედი კანონით კი, ცილისწამება განმარტებულია, როგორც: არსებითად მცდარი ფაქტის შემცველი და პირისთვის ზიანის მიმყენებელი, მისი სახელის გამტეხი განცხადება.

კანონპროექტის მიხედვით:

სასამართლოში ცილისწამების საქმეზე მტკიცების ტვირთი გადადის მოპასუხეზე;
უქმდება ჩანაწერი, რომლის მიხედვით, ყოველგვარი ეჭვი, რომელიც ვერ დადასტურდება კანონით დადგენილი წესით, უნდა გადაწყდეს სიტყვის თავისუფლების შეზღუდვის საწინააღმდეგოდ;
ასევე უქმდება კვალიფიციური პრივილეგია ცილისწამებისთვის;
ახალი რედაქციის მიღების შემდეგ, პროფესიული საიდუმლოების/წყაროს გამხელაზე უარი, შესაძლოა, მოპასუხის საწინააღმდეგო გადაწყვეტილების საფუძველი გახდეს;
ახალი რედაქციის მიღების შემდეგ, გამოხატვის თავისუფლება, შესაძლოა, შეიზღუდოს კერძო ცხოვრების ხელშეუხებლობისა და პერსონალური მონაცემების დაცვის მოტივით;
იცვლება ცილისწამებით მიღებული ზიანის ანაზღაურების წესი. თუ სასამართლო მიიჩნევს, რომ უარყოფა ან შესწორება არაა საკმარისი, მოპასუხეს, შესაძლოა, დაეკისროს ქონებრივი/არაქონებრივი ზიანის ანაზღაურება.
ცილისწამების დავებს სასამართლო შემჭიდროებულ ვადებში განიხილავს. ცილისწამების დავაზე მორიგებისთვის 10 დღე განისაზღვრება.
კანონპროექტზე მომდევნო კენჭისყრა ხვალ გაიმართება.