18 ივნისს ევროპარლამენტში საქართველოში მედიის თავისუფლების საკითხთან დაკავშირებით დებატები გაიმართება. განხილვის მთავარი საკითხი ბათუმელებისა და ნეტგაზეთის დამფუძნებლის, მზია ამაღლობელის საქმე იქნება.

აღნიშნულ თემასთან დაკავშირებული რეზოლუციის კენჭისყრა 19 ივნისს იგეგმება.

Euroscope-ის ინფორმაციით, რეზოლუციის ამ დროისთვის არსებულ შეჯერებულ ვარიანტში 8 პუნქტია.

ევროპარლამენტარები რეზოლუციით მზია ამაღლობელის დაუყოვნებლივ და უპირობო გათავისუფლებას მოითხოვენ და მკაცრად გმობენ ქართული ოცნების რეპრესიებს დემოკრატიულ ინსტიტუტების, ოპოზიციის, მედისსა და სამოქალაქო სექტორის წინააღმდეგ.

“გამოხატავს ღრმა შეშფოთებას ჟურნალისტების მიმართ საქართველოში განხორციელებული თვითნებური დაკავებების, ძალადობისა და შევიწროების ფაქტების გამო, მათ შორის დისკრედიტაციის კამპანიების, სამართლებრივი დევნის, ძალადობისა და დაკავებისას გენდერზე დაფუძნებული ძალადობის გამო; მოუწოდებს ჩატარდეს დამოუკიდებელი გამოძიებები და მოუწოდებს ხელისუფლებას, დაუყოვნებლივ შეწყვიტოს დაშინება და უზრუნველყოს ჟურნალისტების უსაფრთხოება და თავისუფლება”. – ციტირებს Euroscope რეზოლუციის ერთ-ერთ პუნქტს.

რეზოლუციის დრაფტის მიხედვით, რომელიც Euroscope-მა იხილა, ევროპარლამენტარები ხელისუფლებას მოუწოდებენ გაათავისუფლოს ყველა პოლიტიკური პატიმარი.