ოპერაცია ჯერ მხოლოდ ახლა იწყება – ასე პასუხობს ისრაელის თავდაცვის ძალების (IDF) სპიკერი, ბრიგადის გენერალი ეფი დეფრინი ჟურნალისტების კითხვას, თუ რამდენი დღის განმავლობაში ელოდებიან ირანის ბალისტიკური რაკეტებით საპასუხო იერიშების მიტანას.
მან აღნიშნა, რომ სამხედრო უწყება თვალს ადევნებს ირანის გეგმებს და “ირანის პასუხისთვის ემზადება”.
ცოტა ხნის წინ, ისრაელის თავდაცვის ძალებმა და ირანის ოფიციალურმა საინფორმაციო სააგენტო IRNA-მ დაადასტურეს, რომ ისრაელის მიერ ირანზე განხორციელებული საჰაერო დარტყმების შედეგად ირანის „ისლამური რევოლუციის გუშაგთა კორპუსის“ საჰაერო ძალების მეთაური, ბრიგადის გენერალი ამირ ალი ჰაჯიზადე დაიღუპა.
ცნობისთვის, 13 ივნისის დილით ისრაელის არმიამ განაცხადა, რომ ირანში ათეულობით სამიზნეზე, მათ შორის ბირთვულ ობიექტებზე, იერიშები მიიტანა.