მათე დევიძის მხარდასაჭერად, რომელსაც დღეს უსამართლო სასამართლომ 4 წლითა და 6 თვით თავისუფლების აღკვეთა მიუსაჯა, ვაკეში, ჭავჭავაძის გამზირზე, აქტივისტები, სტუდენტები, საზოგადოების სხვადასხვა ფენის წარმომადგენლები შეიკრიბნენ და სინდისის პატიმარს სოლიდარობა გამოუცხადეს.

მოგვიანებით დემონსტრანტებს სხვადასხვა უმაღლესი სასწავლებლების სტუდენტებიც შეუერთდნენ. განიხილებოდა პროტესტის გაგრძელების რამდენიმე ვერსია, საბოლოოდ კი გადაწყდა, რომ უკვე გადაკეტილ და პარალიზებულ ჭავჭავაძეზე კარვები გაშლილიყო.

ასეც მოხდა: ამ დროისთვის ჭავჭავაძეზე გაშლილ კარვებში მოქალაქეები, აქტივისტები და სტუდენტები იმყოფებიან. სტუდენტებმა მიმართვა გაავრცელეს და სხვა სტუდენტებს მოუწოდეს, გამოვიდნენ და გააპროტესტომ მათე დევიძის პატიმრობა.

შეგახსენებთ, მათე დევიძე 19 ნოემბრის საპროტესტო აქციაზე დააკავეს. მას პოლიციელზე თავდასხმას ედავებოდნენ. დევიძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. აღნიშნული ქმედება 4-დან 7-წლამდე თავისუფლების აღკვეთას ითვალისწინებდა.