ევროკავშირი 20 მილიარდი ევროს ღირებულების სამხედრო დახმარების პაკეტს ამზადებს უკრაინისთვის. ინფორმაციას Bloomberg საკითხზე ინფორმირებულ პირებზე დაყრდნობით ავრცელებს.

ამ ინიციატივის ფარგლებში EU-ს ქვეყნები უკრაინას საარტილერიო საბრძოლო მასალას, საჰაერო თავდაცვის სისტემებს, მაღალი სიზუსტის დარტყმის რაკეტების, უპილოტო საფრენ აპარატებსა და სხვა ტიპის იარაღს გადასცემენ. დახმარების მიზანია უკრაინის სამხედრო ბრიგადების გაძლიერებაც.

დახმარების პაკეტზე მუშაობა უკავშირდება აშშ-ს პრეზიდენტის დონალდ ტრამპის მიერ ომის დაწყების უკრაინაზე დაბრალებას, მისი პრეზიდენტისთვის, ვოლოდიმირ ზელენსკისთვის “დიქტატორის” წოდებასა და აშშ-ს წარმომადგენელთა პალატაში ერთ-ერთი რესპუბლიკელი სპიკერის განცხადებას, რომ ვაშინგტონს “აღარ აქვს მადა”, რომ კიევისთვის სამხედრო დახმარების გაგზავნა განაგრძოს.

POLITICO-ს ცნობით, აღნიშნული სამხედრო დახმარების პაკეტის ღირებულება შესაძლოა გაიზარდოს. გამოცემის ინფორმაციით, პაკეტის თავდაპირველი ღირებულება 6 მილიარდი ევრო იყო, რის შემდეგაც 10 მილიარდ ევრომდე გაიზარდა.

უცნობია კონკრეტული დრო, როდესაც ევროკავშირი პაკეტს დაამტკიცებს, ვინაიდან უნგრეთს უთქვამს, რომ იგი შეეწინააღმდეგება ნებისმიერ ახალი სამხედრო დახმარების პაკეტის გადაცემას უკრაინისთვის და ამასთან გერმანიის გამო, სადაც 23 თებერვალს არჩევნების გაიმართება.

დახმარების პაკეტის შესახებ ევროკავშირის საგარეო საქმეთა მინისტრები ორშაბათს, 24 თებერვალს, რუსეთის მიერ უკრაინაში სრულმასშტაბიანი შეჭრიდან 3 წლის თავზე, ბრიუსელში დაგეგმილ საგარეო საქმეთა საბჭოს შეხვედრაზე იმსჯელებენ.