სტრასბურგში, ევროპის საბჭოს საპარლამენტო ასამბლეაზე სიტყვით გამოსვლის დროს ლიეტუვის საგარეო საქმეთა მინისტრმა, გაბრიელიუს ლანდსბერგისმა საქართველოში არსებულ ვითარებასთან დაკავშირებით ღრმა შეშფოთება გამოხატა.
მინისტრმა ხაზი გაუსვა, რომ არჩევნებამდე რამდენიმე კვირით ადრე, მმართველი პარტია როგორც პოლიტიკური ოპოზიციის, ასევე სამოქალაქო საზოგადოების დაშინების კამპანიას აგრძელებს, რაც ლანდსბერგისის განმარტებით, ევროპის საბჭოს ღირებულებებს არ შეესაბამება.
“მოვუწოდებთ ქართველ დეპუტატებს და დიპლომატებს, აიღონ პასუხისმგებლობა და უზრუნველყონ, რომ საქართველო დემოკრატიის, ევროპის გზას დაუბრუნდეს” – განაცხადა გაბრიელიუს ლანდსბერგისმა.
სერიოზულად შეშფოთებულები ვართ საქართველოში არსებული სიტუაციით. არჩევნებამდე რამდენიმე კვირით ადრე მმართველი პარტია აგრძელებს დაშინების კამპანიას როგორც პოლიტიკური ოპოზიციის, ისე სამოქალაქო საზოგადოების და ზოგადად მოსახლეობის წინააღმდეგ. ეს არ შეესაბამება ჩვენს ღირებულებებს. ეს არ შეესაბამება ევროპის საბჭოს ღირებულებებს. ამიტომ მოვუწოდებ ქართველ დეპუტატებს და დიპლომატებს, რომლებიც სწორედ ამ დარბაზში არიან, აიღონ პასუხისმგებლობა და უზრუნველყონ, რომ საქართველო დემოკრატიის, კანონის უზენაესობის, ევროპის გზას დაუბრუნდეს,” – განაცხადა ლანდსბერგისმა.