გერმანია სამხედროების ჩანაწერის გავრცელების შემდეგ რუსეთს ინფორმაციულ ომში ადანაშაულებს. გერმანიის თავდაცვის მინისტრის განცხადებით, რუსეთი აწარმოებს ინფორმაციულ ომს, რომლის მიზანიც გერმანიაში განხეთქილებაა.
მანამდე, რუსეთის უშიშროების საბჭოს თავმჯდომარის მოადგილემ, დიმიტრი მედვედევმა განაცხადა, რომ ჩანაწერი მიუთითებს, რომ ბერლინი ემზადება მოსკოვთან საბრძოლველად.
“ის, რის შესახებაც იქ არის საუბარი ძალიან სერიოზული საქმეა, ამიტომ ახლა ამ ყველაფერს დეტალურად, ინტენსიურად და სწრაფად შეისწავლიან და ეს აუცილებელია” – ამბობს გერმანიის კანცლერი ოლაფ შოლცი.
ჩანაწერის გავრცელების გზებს გერმანიის საგამოძიებო უწყება იკვლევს. ჩანაწერის ავთენტიკურობა გუშინ დაადასტურა გერმანიის თავდაცვის სამინისტრომ, თუმცა როდისაა ის გაკეთებული უცნობია.
“გერმანიის საჰაერო ძალების მაღალჩინოსანი ოფიცრების ონლაინ კონფერენციის ჩანაწერის გავრცელება არის რუსეთის მხრიდან ჰიბრიდული ომისა და დეზინფორმაციის გავრცელების მაგალითი. ეს არის იმ საინფორმაციო ომის ნაწილი, რომელსაც პუტინი აწარმოებს, საუბარია ჩვენი ერთობის რღვევაზე. ჩვენი რეაგირება უნდა იყოს ფრთხილი, მაგრამ მკაფიო. ჩვენ არ უნდა წამოვეგოთ პუტინის ანკესს” ამბობს გერმანიის თავდაცვის მინისტრი, ბორის პისტორიუსი.
შეგახსენებთ, რუსულმა პროპაგანდისტულმა “რაშა თუდეიმ” გამოაქვეყნა 38-წუთიანი ჩანაწერი, რომელშიც გერმანელი ოფიცრები განიხილავდნენ უკრაინისთვის იარაღის მიწოდებასა და კიევის მიერ ყირიმის ხიდზე პოტენციურ დარტყმას. ჩანაწერები დიდი ალბათობით სინგაპურშია გაკეთებული, გერმანიის თავდაცვა ვარაუდობს, რომ ჩამწერი მოწყობილობა სასტუმროში იყო დამონტაჟებული რადგან მისი ერთ-ერთი მონაწილე, სწორედ სინგაპურში გამართულ ონლაინ კონფერენციას ესწრებოდა.
მომხდართან დაკავშირებით, რუსეთის საგარეო საქმეთა სამინისტრომ გერმანიის ელჩი, ალექსანდრე ლამბსდორფი უწყებაში დაიბარა