ხატის შემომწირველთ მივმართავთ, ამოიღონ სტალინის ფრაგმენტი – საპატრიარქო წმ. მატრონას ხატზე

0
161

საქართველოს საპატრიარქომ გაავრცელა ოფიციალური განცხადება, რომლითაც წმ. მატრონას ხატის ყოვლადწმიდა სამების საპატრიარქო ტაძარში შემწირველთ მოთხოვა, რომ აღნიშნულ ხატზე შეიცვალოს ანუ ამოიღონ სტალინი და მისი წმ. მატრონასთან არარსებული შეხვედრის ეპიზოდის გამოსახულება. 

ოფიციალური განცხადება საპატრიარქოს ვებგვერდზეა გამოქვეყნებული:

“წმინდა სამების საკათედრო ტაძარში დასვენებულ წმინდა მატრონას ხატზე გამოსახული ერთ-ერთი ეპიზოდის გამო,  ბოლო დღეებში ურთიერთგამომრიცხავი საუბრები და დაპირისპირებები არ ცხრება, რასაც ერთგვარი პოლიტიკური სახეც მიეცა. ამასთან, ხატი  ყოვლად გაუმართლებელი შეურაცხმყოფელი ქმედების ობიექტი გახდა და  დაძაბულობამაც კიდევ უფრო იმატა.  ვრცელდება სხვა არასწორი შეხედულებებიც, რის გამოც განვმარტავთ შემდეგს:

საერთოდ, ხატზე, ხატწერის კანონიკური წესებიდან გამომდინარე, შეიძლება  დახატული იყოს  არა მხოლოდ წმინდანი, არამედ წმინდანის ცხოვრებასთან დაკავშირებული რეალური ისტორიები ნებისმიერი პიროვნების გამოსახულებით, მათ შორის, ხელისუფალნიც და ჩვეულებრივი ადამიანებიც, მწვალებლებიც და ქრისტიანული სარწმუნოების მდევნელნიც, თვით წმინდანის მწამებელნიც კი; თუმცა ეს საერთოდ   არ ნიშნავს, რომ ხატი  ამ პირებს განადიდებს ან რაიმე ღირსებას განუკუთვნებს, არამედ ასეთი დეტალები წარმოადგენს წმინდანთან დაკავშირებული უტყუარი ფაქტების ასახვას.

ვინაიდან ი. სტალინის შეხვედრა წმ. მატრონასთან, არასაკმარისი მტკიცებულებების გამო, არ არის შეტანილი მისი ცხოვრების კანონიკურ ტექსტში, არ არის აღიარებული რუსეთის ეკლესიის მიერ, რომელმაც იგი  წმინდანად შერაცხა და ამ საკითხთან დაკავშირებით სპეციალური კვლევაც ჩაატარა, აუცილებელია აღნიშნული ეპიზოდის შეცვლა და ხატწერის კანონიკასთან დაკავშირებული სხვა დეტალების გათვალისწინებაც.

მივმართავთ შემომწირველთ, თვითონ შეიტანონ სათანადო ცვლილებები ხატში, ან ამას ჩვენ  გავაკეთებთ.”

წინა სტატიარუსეთმა დროებით ოკუპირებულ აფხაზეთში “ანტიტერორისტული წვრთნა” ჩაატარა
შემდეგი სტატიაჰააგის სასამართლო განიხილავს ისრაელის მხრიდან პალესტინელთა შესაძლო გენოციდის საქმეს
ტელეკომპანია ოდიშის საინფორმაციო სამსახური