საქართველოს რკინიგზა აცხადებს, რომ სამგზავრო მატარებლები სხვადასხვა ლოკაციაზე არაიან გაჩერებული. მიზეზი, მათი განცხადებით, დასავლეთ საქართველოში არსებული უამინდობაა.
ერთ-ერთი მოქალაქე ამბობს, რომ დაახლოებით 2 საათია დგანან წიფას მონაკვეთზე და ვერ იღებენ პასუხს, როდის განახლდება მოძრაობა.
რკინიგზა აცხადებს, რომ ამ დროისათვის უღელტეხილის მონაკვეთზე გათიშულია ქვესადგურები, კერძოდ რკინიგზის საკონტაქტო ქსელს არ მიეწოდება ელექტროენერგია.
“დასავლეთ საქართველოში არსებული უამინდობის გამო სამგზავრო მატარებლები სხვადასხვა ლოკაციაზე არის გაჩერებული. საქართველოს რკინიგზა მაქსიმალურად ცდილობს, რომ სამგზავრო რეისები შეფერხებების გარეშე შესრულდეს, თუმცა აქვე აღვნიშნავთ, რომ რკინიგზისგან დამოუკიდებელი მიზეზების გამო დასავლეთ საქართველოში არსებული უამინდობა რკინიგზაზე სხვადასხვა პრობლემას ქმნის.
ამ დროისათვის უღელტეხილის მონაკვეთზე გათიშულია ქვესადგურები, კერძოდ რკინიგზის საკონტაქტო ქსელს არ მიეწოდება ელექტროენერგია. საქართველოს რკინიგზა ძალისხმევას არ იშურებს, რომ სამგზავრო მატარებლებმა მოძრაობა უმოკლეს დროში განაახლონ შეფერხებების გარეშე, ელექტროენერგიის სტაბილური მოწოდებისთანავე”, – წერია განცხადებაში.