მოსახლეობის ნაწილი უარს აცხადებდა თავისი საცხოვრებელი სახლების დატოვებაზე – გურია

მთელი ღამის განმავლობაში გრძელდებოდა სტიქიის სალიკვიდაციო ღონისძიებები და სამაშველო ოპერაცია. გარემოს მოწყვეტილი ადგილებიდან მაშველებმა კიდევ 63 ადამიანი გამოიყვანეს;

არსებობს ლოკაციები, სადაც გზა სრულად განადგურებულია და მაშველებს მოსახლეობა ნავებითა და სხვა სპეცსაშუალებებით გადმოჰყავთ. ყველასთან დამყარებულია კონტაქტი;

მოსახლეობის დიდი ნაწილი უარს აცხადებდა თავისი საცხოვრებელი სახლების დატოვებაზე, თუმცა მთავრობის წარმომადგენლების ცნობით, უმეტესი ნაწილი დაითანხმეს და მათი გამოყვანის პროცესი ახლაც მიმდინარეობს;

ადგილზე იმყოფებიან საგზაო დეპარტამენტისა და გეოლოგიის სამსახურის თანამშრომლები. დილიდანვე გეოლოგებმა დაიწყეს იმ ლოკაციების შესწავლა, რომელიც საფრთხეს წარმოადგენს და საიდანაც, შესაძლოა, საჭირო გახდეს მოსახლეობის ევაკუაცია;

ადგილზე მუშაობენ როგორც „ენერგო პრო”-ს, ასევე – „სოკარ გაზი“-ს წარმომადგენლები, რათა მაქსიმალურად შემჭიდროებულ ვადებში აღდგეს კომუნიკაციები და მოსახლეობას ჰქონდეს შესაძლებლობა, ისარგებლონ ელექტროენერგიითა და ბუნებრივი აირით;

მიმდინარეობს იმ ოჯახების აღწერა, რომლებსაც სახლები დაენგრათ და საცხოვრებლად აღარ გამოდგება. ხელისუფლება ამბობს, რომ არცერთი მოქალაქე არ დარჩება საცხოვრებლის გარეშე.