შოვში, სტიქიის ზონაში, ამ დროისთვის ნაპოვნია 21 ცხედარი, ეძებენ დაკარგულად მიჩნეულ 12 მოქალაქეს – სამძებრო სამუშაოები 25 კმ-იან პერიმეტრზე, ათამდე ლოკაციაზე მიმდინარეობს, მასში მაშველებთან ერთად, თავდაცვის ძალებიც არიან ჩართული.
დღეს, 9 აგვისტოს ორი ცხედარი იპოვეს, აქედან ერთი ბავშვია. ელოდებიან დნმ-ის ანალიზის პასუხს გუშინ ნაპოვნი ცხედრისა და ცხედრის ფრაგმენტის შესახებ.
ყველა ცხედარი იდენტიფიცირებული არ არის, რაც სტიქიის ეპიცენტრში მოყოლის დროს მიღებული დაზიანებების შედეგია.
ასევე გუშინ, ნაპოვნია მანქანის ძარა და მანქანის ფრაგმენტი. სულ 8 მანქანაა დაკარგული.
რა ვიცით კიდევ?
ზაზა მესხი მის სამ შვილთან ერთად, ჯერაც არაა ნაპოვნი. ერთ-ერთი ვერსიით, მდინარის კალაპოტში ნაპოვნი მანქანა ზაზასი იყო, თუმცა, ამაზე ზუსტი ინფო არ არსებობს.
ძებნა პრიორიტეტულ ადგილებზე მიმდინარეობს (კოტეჯების ადგილი, მჟავე წყლები, მდინარე ჭანჭახის კალაპოტი და სხვ.)ამ ეტაპზე მაშველობის მსურველ მოხალისეებს სტიქიის ზონაში არ უშვებენ, თუ მათი დახმარების საჭიროება დადგება, გამოიყენებენ იმ ბაზას, რომელიც 112-ს აქვს (მღებრიშვილი).