რუსი ოკუპანტები უკრაინაზე მორიგი მასობრივი შეტევისთვის ემზადებიან, – ამის შესახებ “სამხრეთის” დაჯგუფების სპიკერმა ნატალია გუმენიუკმა განაცხადა.
მისი თქმით, ამ დროისთვის, უკრაინის სამხრეთ-აღმოსავლეთ მიმართულებაზე რუსეთის სამხედრო ავიაციის აქტიური მზადება შეინიშნება. ოკუპანტები დაზვერვით ინფორმაციას აგროვებენ და, დიდი ალბათობით, სამომავლოდ შეტევისთვის ემზადებიან.
გუმენიუკმა დაამატა, რომ სრულიად შესაძლებელია, შავ ზღვაში გაიზარდოს რაკეტების მატარებელი ხომალდების რაოდენობა, თუმცა, შეტევები სანაპიროს მხრიდანაცაა მოსალოდნელი.
“არსებობს პრაქტიკა, როცა ოკუპანტები ბუხტებიდან ურტყამენ ჩვენს ქალაქებს, თუმცა ეს საშიშია როგორც თვითონ რაკეტის მატარებელი ხომალდისთვის, ასევე მის ახლოს მყოფი სხვა ხომალდებისთვისაც. მაგრამ ფაქტია, რომ ისინი ამ პრაქტიკასაც მიმართავენ”, – დაამატა ნატალია გუმენიუკმა.