რუსმა ოკუპანტებმა სარაკეტო იერიში წუხელ დნეპრზე მიიტანეს მას შემდეგ, რაც აფეთქება მოხდა როსტოვის ოლქის ქალაქ ტაგანროგში – დნეპრში “ისკანდერის” ტიპის ორი რაკეტა მრავალსართულიან საცხოვრებელ კორპუსსა და სბუ-ს შენობას მოხვდა, რომელიც წელიწადნახევარია, დაცარიელებულია. დაზარალებულთა რაოდენობა დნეპრში 8-მდე გაიზარდა.
ოკუპირებულ ყირიმის ნახევარკუნძულზე, კაზაჩი ბუხტაში წუხელ საბრძოლო მასალების საწყობი აფეთქდა. ამის შესახებ უკრაინის დაზვერვა იტყობინება. “კაზაჩი ბუხტაში ამჟამად 810-ე ცალკეული ბრიგადა იმყოფება. ცნობილია, რომ დივერსიის შედეგად აფეთქება და დეტონაცია მოხდა. დაზარალებულთა შესახებ ინფორმაცია ზუსტდება”, – ნათქვამია დაზვერვის სამმართველოს განცხადებაში.
დღეს უკრაინის სპეციალური სამხედრო ოპერაციების ძალების დღეა. ნახეთ ამ ზალების მიერ ჩატარებული სპეცოპერაციის ამსახველი კადრები ჩვენს ტელეგრამ არხზე, ამ ბმულზე.
ბახმუტის მიმართულებაზე უკრაინის არმიის კონტრშეტევა ისევ გრძელდება: “ბახმუტთან რუსეთის არმიამ იმაზე მეტი სამხედრო დაკარგა, ვიდრე ავღანეთში”, – აცხადებს “აღმოსავლეთის” დაჯგუფების მეთაურის მოადგილე სერგეი ჩერევატი.
“ყირიმში მალე ვიქნებით, “ვაგნერელები” კი ZSU-ს არ აშინებს”, – აცხადებს უკრაინის მთავარი მზვერავი კირილ ბუდანოვი.
რუსეთში ყველაფერი კეთდება მობილიზაციის პროცესის გასამარტივებლად, ანუ იმისთვის, რომ რაც შეიძლება, მეტი ახალგაზრდა გაიგზავნოს უკრაინაში, სასაკლაოზე. ამჯერად სამხედრო აღრიცხვაზე აყვანა ან აღრიცხვიდან მოხსნა შესაძლებელი იქნება სამხედრო კომისარიატებში გამოცხადების გარეშე და ამის გაკეთება შესაძლებელი გახდება სოფლის გამგეობაში, საქალაქო საბჭოში და საპენსიო ფონდშიც კი.