20 ივლისის ღამე ზედიზედ მესამეა, როცა რუსი ოკუპანტები ჰაერიდან, ფრთოსანი რაკეტებითა და დრონებით უტევენ მიკოლაევისა და ოდესის ოლქებს.

მიკოლაევზე შეტევის შედეგად, როგორც სამხედრო-საოლქო ადმინისტრაციის მეთაური ვიტალი კიმი წერს, 18 ადამიანი დაიჭრა, მისივე თქმით, არიან დაღუპულებიც, თუმცა, გუბერნატორს მათი რაოდენობა არ დაუსახელებია.

ოდესის მხარის სამხედრო ადმინისტრაციის ცნობით კი, ქალაქის შემოგარენში ფრთოსანი რაკეტების “მოფრენა”, ძირითადად, სასაწყობე ტერიტორიებზე აღინიშნა, დაზარალდა რამდენიმე ადამიანი. ამავე დროს, დროებით ოკუპირებული ყირიმის გუბერნატორი აქსიონოვი წერს, რომ ღამის განმავლობაში უკრაინამ ნახევარკუნძულის ჩრდილოეთ ნაწილს, დრონების მეშვეობით შეუტია, მისივე თქმით, დაზიანდა საცხოვრებელი სახლები, ერთი მოზარდი გოგონა კი დაიჭრა.

ოდესისა და ჩერნომორსკის საზღვაო პორტებში გუშინ, ღამის განმავლობაში განხორციელებული სარაკეტო იერიშის შედეგად 60 000 ტონა მარცვლეული განადგურდა.

20 ივლისის მონაცემებით, საიუბილეო, 240.000-ზე მეტი რუსი ოკუპანტია ომის დაწყების დღიდან ლიკვიდირებული/დაჭრილი/მწყობრიდან გამოყვანილი, დღე-ღამის განმავლობაში კი 530 რუსი ოკუპანტი მოკლეს.

კერძო სამხედრო ჯგუფ “ვაგნერთან” აფილირებული ტელეგრამ-არხები და რუსული მედია ავრცელებს ვიდეოს, სადაც სავარაუდოდ, ევგენი პრიგოჟინი და დიმიტრი უტკინი (იგივე “ვაგნერი”) მათ ირგვლივ შეკრებილ პირებს მიმართავენ. ადამიანი, რომელიც პრიგოჟინს ჰგავს, ამბობს:

“ის, რაც ქახლა ხდება ფრონტზე, სამარცხვინოა და ჩვენ ამ სირცხვილში მონაწილეობა არ უნდა მივიღოთ – უნდა დაველოდოთ მომენტს, როცა ყველაფერი შეიცვლება და ჩვენი შესაძლებლობების გამოვლენას მაქსიმალურად შევძლებთ”.

როგორც თანამგზავრული ფოტოები ცხადყოფს, ბელორუსის ერთ-ერთ, რუსეთის საზღვართან ახლომდებარე დასახლებაში კარვებია გაშლილი – ისინი დაახლოებით 500-მდეა, ირგვლივ კი დაახლოებით ამდენივე ავტომობილია.