მუშტების ქნევა არაა ქრისტიანობის დაცვა, არასდროს ვიქნები ეპისკოპოსი, რომელიც ქვის სროლას დაუწყებს ცოდვილ ადამიანს – მეუფე საბა

0
222

ჩრდილოეთ ამერიკის ეპისკოპოსი, საბა ინწკირველი ძალადობას გმობს და ამბობს, რომ ქრისტიანობის დაცვა არ უნდა მოხდეს სიძულვილის ენითა და “მუშტების ქნევით”. მისი თქმით, ქრისტიანობას ყველა საკუთარი ცხოვრების წესით იცავს.

მეუფე საბა პირობას დებს, რომ არასდროს იქნება ეპისკოპოსი. რომელიც ქვის სროლას დაუწყებს “ცოდვილ” ადამიანს:

“ჩვენ აქ გვიწევს ჭეშმარიტების და მართლმადიდებლური სარწმუნოების ქადაგება, დამოწმება და დაცვა! დაცვა როგორ?! ზოგს რომ გონია მუშტების ქნევით?, ეს არ არის დაცვა ქრისტიანობის! ქრისტიანობას ჩვენ ვიცავთ საკუთარი ცხოვრების წესით! საკუთარი მაგალითის მიცემით! რადგან ჩვენ ვართ ნათელი ამა სოფლისა! და ჩვენ მოვალე ვართ მივცეთ მაგალითი სხვებს, ვუჩვენოთ სიყვარული სხვებს, ვუჩვენოთ საკუთარი სიწმინდით და ეკლესიის ტრადიციათა დაცვით საკუთარი სარწმუნოება, აი სწორედ მაშინ ვიქნებით ნათელი ამა სოფლისა! რომელიც დიახ, სხვებს და ყველას გაუნათებს გზას! და არა ისე როგორც მავანთ სწადიათ, რომ თითქოს მართლმადიდებლური სარწმუნოება შეიძლება დაცული იყოს სიძულვილის ენით ან სხვათა შეურაცხყოფით, რაც არ უნდა განსხვავებული იყოს ადამიანი!

აი ამას ვერ იტანენ ჩემგან, ეს არ მოსწონთ ჩემში და ყველა სხვაში, ვინც ამბობს: ,,შეიძულე ცოდვა და არა ადამიანი!” აი მათ კი პირიქით, სძულთ ადამიანი და ადამიანები! აი ჩვენ, კი არ გვძულს ცოდვილი ადამიანები, ჩვენ ყველას მოვუწოდებთ სინანულისკენ! ნებისმიერ ადამიანს ვინც არ უნდა იყოს იგი! ყველას მოვუწოდებთ გულწრფელი სინანულისკენ ყველასთვის ღიაა ეკლესიის კარი! ყველას ელოდება ღმერთი ვინც გამოთქვამს სინანულს! მე პირობას ვდებ, მე არასდროს ვიქნები ეპისკოპოსი რომელიც ქვის სროლას დაუწყებს ცოდვილ ადამიანს და ვისაც ასე უნდა, ამ ქვის სროლა, მაშინ მას მოუწევს არა ჩემს წინააღმდეგ, არამედ იესო ქრისტეს წინააღმდეგ წასვლა! ასე რომ მან ისროლოს ქვა ვინც უცოდველია!

სამწუხაროდ ასე იქცევა ზოგი ქრისტიანი და ჩვენ ვუსმენთ მათ, მათ სიძულვილის ენას და ეს სამწუხაროა!

ჩვენც გვეშლება სასულიერო პირებს, ხანდახან სოციალურ ქსელში ზედმეტიც მოგვდის, ესეც ხდება, ჩვენც შეიძლება შეგვეშალოს, მაგრამ ქვა? ქვა არ უნდა ვესროლოთ ერთმანეთს! ჩვენც ადამიანები ვართ და ამისთვის შენდობას ვითხოვთ, მაგრამ მე არასდროს არ ვითხოვ შენდობას იმისთვის რასაც მოძალადეებს ვეუბნები, რომ მათ არ აქვთ უფლება იძალადონ! მათ არ აქვთ უფლება შეურაცხყონ თუნდაც ერთი ადამიანი, რომ არ აქვთ უფლება წინ აღუდგნენ ძალადობით რაიმე ცოდვას! არამედ ძვირფასო ძმებო და დებო ჩვენ ხელშია ერთადერთი იარაღი – საკუთარი ცხოვრება – სხვისთვის მაგალითის მიცემა საკუთარი ცხოვრებით! აი ეს არის ქრისტიანობა! ქრისტემ ხომ მაგალითებით გვასწავლა… მან ხოხ ბოროტებას ბოროტებით არ უპასუხა?! მან ხომ მასზე მოწეულ ძალადობას ძალადობით არ უპასუხა?! არამედ ჯვარს ეცვა და მსოფლიოში ყველაზე დიდი უსამართლობა მას ხვდა წილად! მოვა უფალი და განგვიკითხავს ჩვენ!”

წინა სტატიაუცხო ქვეყნის მოქალაქეს სარფის საბაჟოზე სხეულით ნარკოტიკი გადმოჰქონდა
შემდეგი სტატიაზელენსკი: სანამ ყირიმი ოკუპირებულია, მანამდე ეს ერთ რამეს ნიშნავს – ომი არაა დასრულებული
ტელეკომპანია ოდიშის საინფორმაციო სამსახური