კულტურის მინისტრს, თეა წულუკიანს სასამართლო დავა კიდევ ერთმა გათავისუფლებულმა თანამშრომელმა, მედეა გვაზავამ მოუგო. ამის შესახებ ინფორმაციას “საქართველოს დემოკრატიული ინიციატივა” (GDI) ავრცელებს, რომელიც გვაზავას იურიდიულ დახმარებას უწევდა.

GDI​-ის ცნობით, ნოტარიუსი მედეა გვაზავა თანამდებობიდან წულუკიანმა, რომელიც იუსტიციის მინისტრი იყო, 2020 წლის 22 სექტემბრის ბრძანებით გაათავისუფლა. GDI ამბობს, რომ გათავისუფლების საფუძველი “ნოტარიატის შესახებ” საქართველოს კანონის იმდროინდელი ჩანაწერი იყო, რომლის თანახმადაც, ნოტარიუსს თანამდებობაზე ყოფნის უფლება 65 წლის ასაკამდე ჰქონდა.

“თუმცა, კანონი გამონაკლისის სახით ადგენდა, რომ იუსტიციის მინისტრს შეეძლო ნოტარიუსის განცხადებისა და საქართველოს ნოტარიუსთა პალატის დასაბუთებული რეკომენდაციის საფუძველზე გაეგრძელებინა მისთვის უფლებამოსილების ვადა არაუმეტეს 5 წლით. ამის საპირისპიროდ, მედეა გვაზავას არ დასცალდა ესარგებლა კანონით გათვალისწინებული შესაძლებლობით, ვინაიდან იუსტიციის მინისტრმა ბრძანება მისი გათავისუფლების შესახებ ბევრად ადრე მიიღო, ვიდრე მედეა გვაზავას შეუსრულდებოდა 65 წელი,” – ნათქვამია GDI​-ს განცხადებაში.

ორგანიზაცია ასევე განმარტავს, რომ გვაზავამ ძირითადი სასარჩელო დავა მოიგო, რის საფუძველზეც საქართველოს იუსტიციის სამინისტრომ სასამართლო გადაწყვეტილებები აღასრულა და უფლებამოსილების ვადა გაუგრძელა. აღნიშნულის შემდეგ ნოტარიუსმა მეორე დავა მორალური და მატერიალური ზიანის ანაზღაურებაზე დაიწყო.

თბილისის საქალაქო სასამართლომ მოსარჩელის მოთხოვნა მიუღებელი შემოსავლის ანაზღაურების ნაწილში ნაწილობრივ დააკმაყოფილა და იუსტიციის სამინისტროს მატერიალური ზიანის ანაზღაურება დაავალა.