რუსეთი გაეროს ჰუმანიტარულ მისიას ხერსონის ოლქის მარცხენა სანაპიროზე, რომელიც ოკუპანტი ქვეყნის კონტროლის ქვეშაა, არ უშვებს. ინფორმაციას უკრაინაში გაეროს ჰუმანიტარული მისიის კოორდინატორი, დენის ბრაუნი ავრცელებს.
სანაპიროზე მცხოვრები მოსახლეობა კახოვკის ჰესის განადგურების შედეგად დაზარალდა.
“გაერო მუშაობს უკრაინისა და რუსეთის ფედერაციის მთავრობებთან, რათა ეფექტურად მიაწოდოს ჰუმანიტარული დახმარება ყველა იმ ადამიანს, ვინც დაზარალდა კახოვკის კაშხლის განადგურებით.
რუსეთის მთავრობამ ამ დრომდე უარყო ჩვენი მოთხოვნა მის დროებით სამხედრო კონტროლის ქვეშ მყოფ ტერიტორიებზე წვდომის შესახებ. მოვუწოდებთ რუსეთის ხელისუფლებას იმოქმედოს საერთაშორისო ჰუმანიტარული სამართლის მიხედვით ნაკისრი ვალდებულებების შესაბამისად”, – წერია განცხადებაში.
ბრაუნის განცხადებაში აღნიშნულია, რომ გაერო გააგრძელებს მუშაობას ხერსონის მარცხენა სანაპიროზე მყოფი მოსახლეობისთვის დახმარებაზე წვდომის მოსაძებნად.