უკრაინის არმიის მიერ კონტრშეტევის დაწყება ვოლოდიმირ ზელენსკიმ დღესაც დაადასტურა, თუმცა აღნიშნა, რომ დეტალებზე საუბარს არ აპირებს. კანადის პრემიერთან ერთობლივი ბრიფინგის დროს, ზელენსკიმ დასმულ შეკითხვაზე პასუხად განაცხადა:
“ყველანი პოზიტიურად ვართ განწყობილი, ზუსტად ასე გადაეცით პუტინს”,- თქვა მან და დაამატა:
“უკრაინაში მიმდინარეობს კონტრშეტევითი მოქმედებები, მაგრამ რა სტადიაში ის, ამის შესახებ დაწვრილებით არაფერს ვიტყვი. მე არ დავუჯერებდი ტელეგრამ-არხებს, განსაკუთრებით, პუტინისას… უნდა დავუჯეროთ ჩვენს სამხედროებს”.
უკრაინის თავდაცვის მინისტრის მოადგილე ანა მალიარი კი ისევ სრული სიჩუმის რეჟიმის აუცილებლობაზე მიანიშნებს:
“სანამ ჩვენი მეომრები იბრძვიან, უპასუხეთ საკუთარი თავისთვის დასმულ შეკითხვას: მზად ვარ თუ არა მე, ჩვენი მებრძოლების დახმარების მიზნით, ამა თუ იმ დასახლებული პუნქტის გათავისუფლების შესახებ შევიტყო არა იქ ჩვენი ბიჭების შესვლის, არამედ მათი იქ გამაგრების დროს?
მზად ვარ თუ არა მე გადავიტანო მტრის ინფორმაციული შეტევები, პროვოკაციული შიგთავსის გავრცელებით საომარი მოქმედებების ზონიდან და არ დაველოდო, რომ უკრაინის შეიარაღებული ძალები დაიწყებს თავის მართლებას თითოეულ პოსტსა და ვიდეოზე?”, – წერს ანა მალიარი.