მიმდინარე წლის ოქტომბერში ევროკომისიის სხდომაზე ქვეყნის ევროკავშირის წევრობის კანდიდატის სტატუსის საკითხი უნდა გადაწყდეს, დეკემბერში კი ეს გადაწყვეტილება საბოლოოდ დაადასტურონ ევროკავშირის წევრმა ქვეყნებმა. როგორ სრულდება ევროკომისიის მიერ გაცემული 12-პუნქტიანი რეკომენდაცია? აპრილის ბოლოს საზოგადოებრივმა ორგანიზაციებმა ევროკომისიის მიერ გაცემული 12 პირობის შესრულების შესახებ შეფასება – ე.წ „კანდიდატის სტატუსმეტრი“  გამოაქვეყნეს, რომელიც 2023 წლის 31 მარტამდე პერიოდში არსებულ მდგომარეობას ასახავს. დოკუმენტი „ღია საზოგადოების ფონდის“ ლიდერობით მომზადდა და სამუშაო პროცესში 8 ორგანიზაცია იყო ჩართული.  დასკვნის თანახმად, ამ ეტაპზე  სრულად შესრულებულია მხოლოდ ერთი პუნქტი, რომელიც სტრასბურგის სასამართლოს გადაწყვეტილებების გათვალისწინებას გულისხმობს. დიდწილად შესრულებულია ორი პირობა: რეკომენდაციები გენდერული თანასწორობისა და ორგანიზებული დანაშაულის წინააღმდეგ ბრძოლასთან დაკავშირებით;  ნაწილობრივ შესრულებულია ოთხი და შესასრულებელია ევროკავშირის კიდევ ხუთი პირობა. ანუ დღეის მონაცემებით გაცემული რეკომენდაციების უმეტესობა ან არ არის  შესრულებული, ან მხოლოდ ნაწილობრივ მოხდა მათი გათვალისწინება. „ფონდი ღია საზოგადოების“ ევროინტეგრაციის პროგრამის მენეჯერი, ვანო ჩხიკვაძე საუბრობს სფეროებზე, სადაც შესაძლებელია რეკომენდაციების სრულად შესრულება და მიმართულებებზე, რომლებზეც გრძელვადიან პროცესშია სამუშაო.