უკრაინული მედია, პოლონურ რადიო RMF FM-ზე დაყრდნობით წერს, რომ უნგრეთმა დაბლოკა ევროკავშირის ინიციატივა, გამოეთქვათ პროტესტი საქართველოს ხელისუფლების მიმართ ექს-პრეზიდენტის, მიხეილ სააკაშვილის საქმესთან დაკავშირებით.
გავრცელებული ინფორმაციით, პოლონეთი გამოდიოდა მიხეილ სააკაშვილისთვის სასჯელის მოხდის შეჩერების ინიციატივით, რათა მას საზღვარგართ მკურნალობის საშუალება ჰქონოდა. ეს წინადადება შეტანილი უნდა ყოფილიყო ევროკავშირის დიპლომატიურ პროტესტში, რომლის თბილისისთვის გამოხატვაც იგეგმებოდა.
პოლონეთის პრემიერმინისტრმა გასულ კვირას ევროკავშირის სამიტის შემდეგ განაცხადა, რომ მისი ქვეყანა მზად იყო მიეღო მიხეილ სააკაშვილი სამკურნალოდ.
მედია წერს, რომ პოლონეთის წინადადებას უნგრეთის გარდა ყველა ქვეყანამ დაუჭირა მხარი. ევროკავშირის დიპლომატები აცხადებენ, რომ ყველა ღონეს ხმარობენ, რათა დაარწმუნონ ბუდაპეშტი – გადაიფიქროს.
აღნიშნულია, რომ ევროკავშირში ერთსულოვნების მიღწევის შემთხვევაში, თბილისზე გავლენის ინსტრუმენტად შესაძლოა გამოიყენონ საქართველოს ევროპული მისწრაფებები.
მედია წერს, რომ საგარეო და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის პრესმდივანმა უარი თქვა კომენტარი გაეკეთებინა მიხეილ სააკაშვილის საქმის გამო ევროკავშირის შესაძლო პროტესტზე.