მიხეილ სააკაშვილის დედის, გიული ალასანიას თქმით, დღევანდელ სასამართლო სხდომაზე მოსამართლე გიორგი არევაძე არჩევანს “სიკვდილსა და სიცოცხლეს შორის აკეთებს”.
ალასანიამ ჟურნალისტებთან საუბრისას თქვა, რომ მას იმედი აქვს, სასამართლო დაცვის მხარის გადაწყვეტილებას დააკმაყოფილებს. მანვე აღნიშნა, რომ უარყოფითი გადაწყვეტილების შემთხვევაში, დაცვის მხარე სტრასბურგის სასამართლოს მიმართავს.
რაც შეეხება მიხეილ სააკაშვილის ჯანმრთელობის მდგომარეობას, ალასანიას თქმით, ის კვლავ სუსტადაა.
“სუსტად არის, რა თქმა უნდა, როგორც ყოველთვის სუსტადაა, ეს ბოლო დღეები ძალიან. რაც შეეხება მოლოდინებს, არაფერი ვიცით, მე იმედი მაქვს, იქნება დადებითი, მაგრამ არ ვიცით. თვითონ არაფერს ამბობს, უცდის. თუ ეს იქნება უარყოფითი, ეს ყველაფერი პუტინის ინტერესებში იქნება. უარყოფითის შემთხვევაში, სტრასბურგს მაშინვე ვაპირებთ.
მოსამართლემ არჩევანი სიკვდილსა და სიცოცხლეს შორის უნდა გააკეთოს”, – თქვა გიული ალასანიამ.
შეგახსენებთ, დღეს, 6 თებერვალს თბილისის საქალაქო სასამართლოში მიხეილ სააკაშვილის სასჯელისგან გათავისუფლების ან სასჯელის გადავადების საქმეზე მორიგი სხდომა გაიმართება. პროცესზე მხარეები დასკვნით სიტყვას წარადგენენ, რის შემდეგაც მოსამართლე გიორგი არევაძე სათათბიროდ გავა. უცნობია დღესვე გამოაცხადებს თუ არა სასამართლო გადაწყვეტილებას.